G7-ის ლიდერების ხუმრობას პუტინმა ირონიით და შეურაცხმყოფელი ქვეტექსტით უპასუხა, თან იმას გაუსვა ხაზი, რომ თვითონ ფორმაშია, მისი კოლეგები კი არა. იქვე ირონიულად დაამატა, რომ აქებს მათ, რადგან ფიზიკურ ჯანმრთელობაზე საუბარი დაიწყეს.

რატომ არის მნიშვნელოვანი: ვლადიმერ პუტინი "სიძლიერის" დემონსტრაციისთვის ხშირად ავრცელებს ფოტოებს ვარჯიშიდან, თევზაობიდან და ა.შ.

  • უმეტეს მათგანში რუსეთის პრეზიდენტი წელსზევით შიშველია — კადრებს კრემლის პროპაგანდა იმის საჩვენებლად იყენებს, რომ ის ფორმაშია, ჯანმრთელია და ქვეყნის მართვა შეუძლია.
  • მაგალითად, რუსეთის სახელმწიფო მედიამ რამდენჯერმე გამოაქვეყნა ფოტო, სადაც ის ცხენზე მკერდმოშიშვლებული ზის, ატარებს ოქროს ჯაჭვს, სათვალეს და აცვია სამხედრო შარვალი.

რა მოხდა: G7-ის ლიდერებმა რუსეთის პრეზიდენტის შესახებ სამიტზე იხუმრეს. ამ თემაზე საუბარი დიდი ბრიტანეთის პრემიერმინისტრმა, ბორის ჯონსონმა დაიწყო, შემდეგ კი ჯანსტინ ტრუდომ და ურსულა ფონ დერ ლაიენმა განავრცეს.

  • "გავიხადოთ ქურთუკები, თუ კიდევ უფრო მეტი რამ? ჩვენ ყველამ უნდა ვაჩვენოთ, რომ პუტინზე მაგრები ვართ", — ამბობს ჯონსონი.
  • "მკერდმოშიშვლებული ჭენება", — პასუხობს კანადის პრემიერმინისტრი.
  • "ოჰ, დიახ, ჭენება საუკეთესოა", — აღნიშნა ევროკომისიის პრეზიდენტმა.

რა თქვა პუტინმა: მან ხაზი გაუსვა, რომ G7-ის ლიდერებს კარგად იცნობს, მაგრამ ახლა ურთიერთობის საუკეთესო პერიოდი არ ქვთ. აქვე დაამატა, რომ ისინი ლიდერები არიან, რაც ნიშნავს, რომ ხასიათი აქვთ, ამიტომ თუ მოინდომებენ და საკუთარ თავზე იმუშავებენ, "სასურველ წარმატებას მიაღწევენ".

  • "არ ვიცი, როგორ სურდათ გახდა — წელამდე თუ წელს ქვემოთ, მაგრამ ვფიქრობ, რომ ნებისმიერ შემთხვევაში ამაზრზენი სანახაობა იქნებოდა".
  • "მაგრამ თუ გავიხსენებთ პუშკინს, შეიძლება სიტყვებსა და დეტალებში შევცდე, ჩემი აზრით, მან თქვა: "შეგიძლია იყო საქმიანი ადამიანი და იფიქრო ფრჩხილების სილამაზეზე".
  • "ამიტომ, რა თქმა უნდა, ვეთანხმები ამას: ადამიანში ყველაფერი ჰარმონიულად უნდა იყოს განვითარებული, სულიც და სხეულიც".
  • "მაგრამ იმისათვის, რომ ყველაფერი ასე ჰარმონიული იყოს, თქვენ უნდა მიატოვოთ ალკოჰოლის ბოროტად გამოყენება, სხვა მავნე ჩვევები, დაკავდეთ ფიზიკური კულტურით, სპორტით".