TV 25-ის ინფორმაციით, ბათუმის საკრებულოს დეპუტატს, რიჩარდ სირაბიძეს ოპონენტების დისკრედიტაციის კამპანიაში სტუდენტები ჰყავს ჩართული. ტელეკომპანიის განცხადებით, მოიპოვეს სქრინები ბათუმის სახელმწიფო უნივერსიტეტის თვითმართველობის ჩატიდან, რომელშიც სირაბიძე პოსტების გაზიარებას ითხოვს.

რატომ არის მნიშვნელოვანი: არაერთი ავტორიტეტული ორგანიზაცია საუბრობს იმაზე, რომ ხელისუფლება სოციალურ ქსელებში ოპონენტების დისკრედიტაციის კამპანიაშია ჩართული და პარალელურად, მხარდაჭერის იმიტირებას ცდილობს.

  • ამ თემაზე On.ge-მ მკითხველს რამდენჯერმე უამბო და ის პროსახელისუფლებო გვერდები გამოავლინა, რომლებიც მმართველი პარტიის ნარატივებით ოპოზიციას, აქტივისტებს და უფლებადამცველებს ესხმიან თავს.
  • შეგახსენებთ, რომ 2019 წელს ფეისბუქმა მმართველ გუნდთან დაკავშირებული არაავთენტური ქსელიც წაშალა, რომელიც ოპოზიციის წინააღმდეგ მოქმედებდა.
  • გარდა ამისა, პრობლემურია ისიც, რომ სტუდენტური თვითმართველობების დამოუკიდებლობა ხშირად დგება კითხვის ნიშნის ქვეშ და მათ ხელისუფლების ინტერესების გატარებაში ადანაშაულებენ.

დეტალები: TV 25-ის ინფორმაციით, ჩატს BSU 41 ქვია. მათ გავრცელებულ სქრინებში ჩანს, რომ დეპუტატი სტუდენტებს ოპოზიციასა და ხელისუფლებისადმი კრიტიკულად განწყობილ პირებზე დამცინავ პოსტებს უგზავნის და თვითმართველობის თავმჯდომარესთან ერთად გადაზიარებას ითხოვს.

  • მაგალითად, ვხედავთ ელენე ხოშტარიაზე, აქტივისტ გიგა მაქარაშვილზე და წამყვან მიშა მშვილდაძეზე ირონიულ პოსტებს.
  • "მოხოდეთ ეს პოსტი", "გადავაზიაროთ და დავცინოთ", "დავაჰაჰავოთ", "გადააზიარეთ ეს აგენტი", — ეს იმ შეტყობინებების მოკლე ჩამონათვალია, რომელიც ტელეკომპანიის გავრცელებულ კადრებში ჩანს.
  • გარდა ამისა, დეპუტატი ითხოვს სქრინებსაც იმის დასტურად, რომ პოსტი გადააზიარეს.

ფოტო: TV 25

რას ამბობს სირაბიძე: ის TV 25-ის ჟურნალისტთან არ გაჩერდა და ყოველ ჯერზე კითხვას თავი აარიდა.

  • თუმცა სქრინების შინაარსი ნაწილობრივ დაადასტურა, როდესაც კითხვას — რა სტატუსითაა ბსუ-ს ჩატში — ასე უპასუხა: "არ არის ეგ ბსუ-ის ჩატი, არაა".
  • ჟურნალისტმა აღნიშნა ისიც, რომ ნანახი აქვს მისი მესიჯები, რაზეც სირაბიძემ თქვა: "მშვიდობაში გქონდეთ, რა ვქნა ახლა".

რას ამბობენ თვითმართველობაში: თავმჯდომარე ლიკა დიასამიძე ამტკიცებს, რომ ის და სირაბიძე არანაირ დავალებებს არ გასცემენ, მხოლოდ მეგობრები არიან და საქმიანი ურთიერთობა არ აქვთ.

  • მან განაცხადა, რომ მსგავსი დავალებების გაცემის მტკიცებულებები არ არსებობს, მაგრამ როცა ჟურნალისტმა შესთავაზა იმ სქრინშოტების ნახვა, რომელითაც ეს დასტურდება, პასუხად მიიღო: "მოეშვით პროვოკაციას, უნდა გეჩვენებინათ აქამდე".
  • ჩატში მყოფი სხვა სტუდენტები უარყოფენ, რომ საკრებულოს დეპუტატისგან და თვითმმართველობის თავმჯდომარისგან მსგავს დავალებებს იღებენ.
  • TV 25-თან სატელეფონო ინტერვიუში ერთ-ერთი სტუდენტი კითხვაზე — რატომაა დეპუტატი მათ ჩატში — პასუხობს, რომ არ იცის.