პრემიერმინისტრს ჰგონია, რომ ასეთმა რიტორიკამ ქვეყნის ევროპული პერსპექტივა უზრუნველყო.

რატომ არის მნიშვნელოვანი: EU-სთვის "ფარდის ახდით" ღარიბაშვილი ევროპარლამენტის რეზოლუციის შემდეგ, ევროკომისიის რეკომენდაციამდე რამდენიმე დღით ადრე იმუქრებოდა.

  • ევროატლანტიკულ გზაზე მდგომი ქვეყნის ლიდერისგან მსგავსი განცხადებები ევროპული ინსტიტუტების მიმართ სადავოა, მით უმეტეს მაშინ, როცა ქვეყანა მნიშვნელოვან გადაწყვეტილებას ელოდებოდა.
  • მას შემდეგ, რაც ევროკომისიამ ქვეყნის ევროპული პერსპექტივა აღიარა, მაგრამ სტატუსზე რეკომენდაცია არ მოგვცა, მმართველმა პარტიამ ამ "ფარდის ახდა" გადაიფიქრა.

დეტალები: დღევანდელ ბრიფინგზე კითხვას, აპირებს თუ არა გაასაჯაროოს ის დეტალები, რომლის შესახებაც რეზოლუციის შემდეგ საუბრობდა და ფარდის ახდას უწოდებდა, პრემიერმა ასე უპასუხა:

  • "ჩემი მაშინდელი ემოციური რეაქცია იყო აბსოლუტურად გააზრებული და მე ეს შეგნებულად გავაკეთე".
  • "რომ არა ჩემი და ჩვენი გუნდის პრინციპული დამოკიდებულება და ჩვენი საჯარო მიმართვა ევროპისადმი, შესაძლოა, ვახსენებ რა ჩვენს ოპონენტებს, მათ ლობისტებს და პარტნიორებს, შესაძლოა, საქართველოს დღეს არ მიეღო ეს დამსახურებული ევროპული პერსპექტივა".
  • "ამის რისკები დავინახეთ ჩვენ. ვინაიდან, წარმოგიდგენიათ, ყოვლად უსამართლო, შეურაცხმყოფელი რეზოლუცია იქნა მიღებული და ჩვენ ეს ღიად ვთქვით ყოველგვარი დაფარვის და მიკიბვ-მოკიბვის გარეშე, ცალსახად და ერთმნიშვნელოვნად, რომ ჩვენ არ შევეგუებით არასდროს უსამართლობას და შეურაცხყოფას და ყოველთვის გვექნება ძალიან მძაფრი, სამართლიანი და პროპორციული შეფასებაც, ქმედებაც და რეაქციაც".
  • "რა თქმა უნდა, ჩემი და ჩემი გუნდის ამ პრინციპულობას გარკვეული როლი ამაში მიუძღვის. ამ ჩვენმა პრინციპულმა, მტკიცე დამოკიდებულებამ და ჩვენმა დემონსტრაციამ თავისი როლი შეასრულა".