საქართველოს ახალგაზრდა იურისტთა ასოციაცია საჯარო სამსახურის ბიუროსთვის საქართველოს კულტურისა და ძეგლთა დაცვისა მინისტრის, მიხეილ გიორგაძისა და მისი მოადგილის, კახი კანდელაკის დეკლარაციის შესწავლის მოთხოვნით მიმართვას გეგმავს. ამის შესახებ საიამ დღეს, 27 აპრილს გაავრცელა ინფორმაცია.

"მოთხოვნის წინაპირობას წარმოდგენს საიას მიერ 2016 წლის დეკემბერსა და 2017 წლის აპრილში გამოქვეყნებული მონაცემები, რომელიც მინისტრის და მოადგილის სავარაუდო კავშირზე მიუთითებს შპს ინტერნეიშენალ ივენთთან," - აღნიშნავენ საიაში და ამბობენ, რომ ამ კომპანიის სახელმწიფო ვალი 1 789 722 ლარია, კომპანიის იურიდიული მისამართი კი, გიორგაძის სახელზე რეგისტრირებული უძრავი ქონებაა.

სიამ გიორგაძის შესახებ ინფორმაცია მიმდინარე წლის 21 აპრილსაც გაავრცელა. ორგანიზაციაში ამბობდნენ, რომ კომპანიას, რომელიც დღემდე კულტურის მინისტრის, მიხეილ გიორგაძის, ბინაშია რეგისტრირებული, სახელმწიფოს ვალი მილიონ ლარზე მეტი აქვს. ვალის დაფარვისთვის განსაზღვრული ვადა კი, 2017 წლის პირველ იანვარს ამოიწურა.