უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი განცხადებით, ქართულმა სპეცსამსახურებმა მიიღეს დავალება პოლიტიკური პირებისგან, რომ არ ჩარეულიყვნენ ამ საკითხში.

"რუსები საქართველოს ტერიტორიიდან სანქცირებული საქონლის კონტრაბანდის არხს აყალიბებენ. საერთაშორისო სანქციების დაწესების გამო, რუსეთის ფედერაციამ დაკარგა სამხედრო, ორმაგი დანიშნულების და სამოქალაქო საქონლის ფართო სპექტრის მიწოდების შესაძლებლობა. სანქციებს გვერდი რომ აუარონ, რუსეთის აგენტები აყალიბებენ კონტრაბანდის არხებს, რომლებიც გადის, კერძოდ, საქართველოს ტერიტორიაზე. ამასთან, საქართველოს სპეცსამსახურების წარმომადგენლებს პოლიტიკური ხელმძღვანელობამ დაავალა, არ შეუშალონ ხელი კონტრაბანდისტების საქმიანობას", — ვკითხულობთ განცხადებაში.

დაზვერვაში აცხადებენ, რომ დღეს ცნობილია რუსეთის ფედერაციისთვის სამხედრო პროდუქციის მიწოდების კიდევ ერთი არხი, აღმოსავლეთ აზია. მათივე თქმით, განიხილება საქართველოსა და რუსეთის ფედერაციას შორის საჰაერო მიმოსვლის აღდგენის შესაძლებლობა.

ამ ეტაპზე საქართველოს მთავრობიდან ამ განცხადებას არავინ გამოხმაურებია. On.ge ცდილობს სამთავრობო გუნდის პასუხის გაგებას, რომელსაც მიღებისთანავე შემოგთავაზებთ.

ომის დაწყების შემდეგ საქართველოსა და უკრაინას შორის ურთიერთობები დაიძაბა. თავდაპირველად მიზეზი ქართველი მოხალისეების უკრაინაში გაფრენის შეფერხება გახდა, რის გამოც უკრაინის პრეზიდენტმა ელჩი კონსულტაციებზე გაიწვია. კიდევ ერთ მიზეზად მან რუსეთისთვის სანქციების დაწესებაზე მთავრობის "ამორალური პოზიცია" დაასახელა. მოგვიანებით ვოლოდიმირ ზელენსკიმ უკრაინის ელჩი საერთოდ გაიწვია და განმარტა, რომ თუ კონკრეტული ქვეყნებიდან არ იქნება სანქციები და დახმარება, უკრაინის ასეთ წარმომადგენლები სახლში უნდა დაბრუნდნენ.