გარდაიცვალა ბიზნესმენი დენის კირეევი, რომელიც რუსეთთან მოლაპარაკებებზე უკრაინის დელეგაციის წარმომადგენელი იყო. 5 მარტს დღის განმავლობაში მედია წერდა, რომ ის სახელმწიფო ღალატში დაადანაშაულეს და დაკავებისას მოკლეს, თუმცა დღის ბოლოს სულ სხვა განცხადება გაავრცელა თავდაცვის სამინისტროს დაზვერვის მთავარმა სამმართველომ — მათი განცხადებით, კირეევი სპეციალური დავალების შესრულებისას დაიღუპა.

რა მოხდა

უკრაინული მედიების ინფორმაციით, დენის კირეევი რუსეთ-უკრაინის პირველ მოლაპარაკებებს ესწრებოდა. თუმცა ოფიციალურად მისი სახელი მომლაპარაკებელთა იმ სიაში არ ყოფილა, რომელიც უკრაინის პრეზიდენტის ადმინისტრაციამ გაავრცელა. მათთვის უცნობია, კონკრეტულად რაზე იყო პასუხისმგებელი კირეევი და როგორ აღმოჩნდა მომლაპარაკებელთა შორის.

უკრაინსკაია პრავდა "ძალოვან სტრუქტურებსა და პოლიტიკურ წრეებში გავლენიან" წყაროზე დაყრდნობით წერდა, რომ უშიშროების სამსახურს ჰქონდა აშკარა მტკიცებულებები კირეევის ღალატის შესახებ, მათ შორის სატელეფონო საუბრები. მედიები ხაზს უსვამდნენ იმასაც, რომ კირეევზე ჯერ კიდევ ომის დაწყებამდე არებობდა ეჭვები რუსულ სპეცსამსახურებთან ურთიერთობაზე.

დღის განმავლობაში ამ მოსაზრებებსა და ჭორებს უკრაინის ოფიციალურ უწყებები არ გამოხმაურებიან. საღამოს კი დაწერეს, რომ კირეევი და 2 სხვა პირი სპეციალური დავალების შესრულებისას დაიღუპა უკრაინის დასაცავად.

"სპეციალური დავალებების შესრულებისას დაიღუპა სამი ჯაშუში — თავდაცვის სამინისტროს მთავარი სადაზვერვო სამმართველოს თანამშრომლები: დოლია ალექსეი ივანოვიჩი, ჩიბინევი ვალერი ვიქტოროვიჩი, კირეევი დენის ბორისოვიჩი", — ნათქვამია შეტყობინებაში და იქვე აღნიშნულია, რომ გმირები არ კვდებიან და ისინი ცოცხლობენ მანამ, სანამ ხალხს ახსოვს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში