24 თებერვალს რუსეთი უკრაინაში შეიჭრა და სრულმასშტაბიანი ომი წამოიწყო, რომელიც დღემდე გრძელდება. უკრაინაში მიმდინარე მოვლენებმა მთელი მსოფლიო აალაპარაკა. სახელმწიფო ლიდერების, ორგანიზაციების წარმომადგენლებისა თუ ცნობილი ადამიანების გარდა, მოსახლეობაც ცდილობენ, უკრაინელების დახმარებაში საკუთარი წვლილი შეიტანონ.

საქართველოში რიგითი მოქალაქეები უკრაინელებს თავშესაფარს, საჭირო ნივთებს, ფინანსურ დახმარებასა თუ სიტყვიერ მხარდაჭერას სთავაზობენ. მიმდინარე მოვლენებმა ზრდასრულების გარდა ბავშვების ყურადღებაც მიიპყრო, რომლებიც ომსა და მეგობარ ქვეყანაში თანატოლების დაღუპვას განსაკუთრებულად განიცდიან.

ამ ბავშვებს შორის გურჯაანის მე-2 და მე-4 საჯარო სკოლების მოსწავლეებიც არიან, რომლებმაც გადაწყვიტეს, უკრაინელი თანატოლები წერილებით გაამხნევონ. წერილები გურჯაანის ახალგაზრდულმა საბჭომ შეაგროვა და მათ უკრაინაში ჰუმანიტარულ დახმარებასთან ერთად გააგზავნიან.

1. "ჩვენ ეს ამბავი რომ გავიგეთ, ყველას გული აგვეწვა."

2. "უკრაინა გაიმარჯვებს. ჩვენ თქვენ გვერდით ვართ. მხარს გიჭერთ."

3. "არ ინერვიულოთ. დედაჩემმა უნდა ტასაცმელები გამოგიგზავნოთ."

4. "მე თქვენი მჯერა."

5. "არ მინდა, იღუპებოდნენ ბავშვები. ჩვენ ხომ ჯერ ახლა ვიწყებთ სამყაროს შეცნობას."

6. "ყველაფერი კარგად იქნება. თქვენ გვერდით ვართ. ჩვენ მეგობრები ვართ. მიყვარხართ. თქვენთვის ვლოცულობ."

7. "გამარჯობა, მე თიკა ვარ, 12 წლის. ამ წერილით მინდა, გაგამხნევოთ და გამძლეობა გისურვოთ. მინდა, რომ ეს ომი მალე დამთავრდეს, რადგან ომში ჩემი ბიძაშვილიცაა წასული. ძალიან მიყვარხართ.

8. "ძვირფასო უკრაინა, მინდა გითხრათ, რომ თქვენ მხარეს ვართ. ჩვენ მხარს გიჭერთ და თქვენთვის ვლოცულობთ. ეცადეთ, მაქსიმალურად დაიცვათ საკუთარი თავი. გაძლიერდით, თქვენ ყველაფერი გამოგივათ! დიდება უკრაინას!"

9. "ყველამ ვიცით, როგორი პატრიოტები ხართ თქვენი ქვეყნის..."

10. "მადლობას გიხდით 2008 წელს გაწეული დახმარებისთვის. ახლა კი ჩვენი დრო დადგა. ქართველი მოქალაქეები თავგანწირვით იბრძვიან თქვენ გვერდით, მაგრამ ვინც ვერ იბრძვის თქვენ გვერდით, სულით და გულით თქვენთვის ვლოცულობთ".

11. "გამარჯობა, მე ნატა ვარ. უკრაინა ძალიან მიყვარს. ვიცი, რომ ახლა ომია და თქვენ მხარეს ვარ. 18 წლის რომ ვიყო, თქვენს დასახმარებლად მოვიდოდი, მაგრამ 11 წლის ვარ. ძალიან მიყვარხართ".

12. "გამარჯობა, მე საქართველოდან ვარ. უკვე ვიცი, რა მდგომარეობაში ხართ და წერილს ამიტომ გწერთ. მინდა გითხრათ, რომ მხნედ იყოთ, რადგან შეუძლებელი არაფერია. მალე ყველაფერი კარგად იქნება. არ დაგავიწყდეთ, რომ მარტო არ ხართ — უამრავი ადამიანი თვალდახუჭული გენდობათ და მხარს გიჭერთ, რადგან მათ თქვენი სჯერათ. ირწმუნეთ საკუთარი თავის. არ დანებდეთ და იმედი არ დაკარგოთ. დავასრულე წერილი. იმედია, გაგამხნევებთ".

13. "ძვირფასო უკრაინა, ძალიან მიყვარხარ. იმედია, ომი მალე დამთავრდება, რადგან ხალხი კვდება და დახმარება გჭირდება. საქართველო და ნატო დაგეხმარება. შენ ჩემი საუკეთესო მეგობარი ხარ. პუტინი ყველაზე საშინელი ადამიანია, ვინც კი ვიცი. ზელენსკი, შენ საუკეთესო ადამიანი ხარ, რადგან შენი ქვეყანა და ხალხი გიყვარს. დიდება უკრაინას".

14. "გამარჯობა. პირველ რიგში წარმატებას გისურვებთ. გამხნევდით, ერთმანეთს მხარი დაუჭირეთ და ერთად იყავით. როცა თქვენი ამბავი გავიგე, ძალიან მეწყინა. გავიგე, რა თქვეს გარდაცვლილ ხალხსა და პატარა ბავშვებზე. მინდა, ომი მალე დამთავრდეს — რა თქმა უნდა, თქვენი გამარჯვებით. სიყვარულით, ანი ოსიაშვილი".

15. "გამარჯობა, მე თქვენი გულშემატკივარი ვარ საქართველოდან. ძალიან ვწუხვარ, რომ რუსეთმა უკრაინასთან ომი დაიწყო. მე მხარს ვუჭერ უკრაინელ ხალხს. იმედი მაქვს, მალე ომი დამთავრდება და ყველაფერი იდეალურად იქნება. ყველგან მშვიდობა და სიჩუმე დაისადგურებს. დიდება უკრაინას".