უკრაინის პროკურატურის განცხადებით, მერი, რომელმაც რუსებს ქალაქი ჩააბარა, სახელმწიფო ღალატშია ეჭვმიტანილი.

"ის განზრახ მოქმედებდა უკრაინის საზღვრების შესაცვლელად, რაც საჯაროდ გამოაცხადა ინტერნეტში. მსგავსი ქმედებების შედეგად კუპიანსკის ტერიტორია უკრაინის სახელმწიფო ხელისუფლების ადმინისტრაციული დაქვემდებარებიდან გამოვიდა.

სისხლის სამართლის საქმეზე წინასასამართლო გამოძიებას აწარმოებენ ხარკოვის რეგიონის SBU ოფისის გამომძიებლები", — აცხადებს პროკურატურა.

ხარკოვის ოლქის, კუპიანსკის მერმა, გენადი მაცეგორამ ქალაქი რუს ოკუპანტებს ჩააბარა. უკრაინსკაია პრავდას ინფორმაციით, ის ოპოზიციური პარტიის წარმომადგენელია.

მერმა რუსულენოვანი ვიდეომიმართვა გაავრცელა, რომელშიც ჩანს, რომ მას წინ ტელეფონი უდევს. სავარაუდოდ, ის ტექსტს კითხულობს.