ხარისხიანი ნამუშევრის გადაღება მრავალ დეტალთანაა დაკავშირებული: რეჟისორის ხედვა, მსახიობების ოსტატობა და შესრულება, სცენარი და ა.შ. ერთ-ერთი მთავარი რამ, რაც დამაჯერებელი ატმოსფეროს შექმნაში გადამწყვეტ როლს თამაშობს, პერსონაჟების ჩაცმულობაა. ჩაცმულობა ხშირად ეპოქაზე, პერსონაჟის სოციალურ სტატუსზე, პროფესიასა თუ მის ხასიათზე მიგვანიშნებს.

რადგანაც ტანსაცმელი ფილმებში უდიდეს როლს თამაშობს, საუკეთესო კოსტიუმების დიზაინისთვის ამერიკის კინოაკადემიამ ოსკარიც დააწესა. ნომინაციაში კი გამარჯვება წლების განმავლობაში არაერთმა გამორჩეულმა ნამუშევარმა მიიღო, რომელთაგან ამ სტატიაში 10 ფილმს წარმოგიდგენთ:

1. Titanic / ტიტანიკი (1998)

ლეონარდო დიკაპრიოსა და ქეით უინსლეტის დასამახსოვრებელი შესრულებისა და დაუვიწყარი დასასრულის გარდა, ტიტანიკმა ჩვენი გულის მოგება კოსტიუმებითაც შეძლო. დიზაინერი დებორა ლინ სკოტი აღნიშნული ეპოქის ეტიკეტსა და ჩაცმის კულტურაზე წიგნებს ხშირად კითხულობდა, რათა თითოეულ სცენაში ნებისმიერი პერსონაჟის ჩაცმულობა დამაჯერებელი ყოფილიყო.

2. Gladiator / გლადიატორი (2001)

რიდლი სკოტის დაუვიწყარი ფილმი დასამახსოვრებელი კოსტიუმების გარეშე ვერ შედგებოდა. დიზაინერ ჯენტი იეტსის მიხედვით, მთავარ პერსონაჟს ფილმში 12 აბჯარი დასჭირდა. თითოეულ შემთხვევაში აბჯრის 8 ასლს ამზადებდნენ, რომლის ნახევარიც მსახიობის დუბლიორს სჭირდებოდა. აბჯრის დამზადება მარტივი არ იყო, რადგან მას მოხერხებულობისთვის რეზინისგან ქმნიდნენ, თუმცა კოსტიუმს ნამდვილი მეტალისგან დამზადებულის ელფერი უნდა ჰქონოდა.

3. The Lord Of The Rings: The Return Of The King / ბეჭდების მბრძანებელი: მეფის დაბრუნება (2004)

ბეჭდების მბრძანებლის დაუვიწყარი სამყაროს შექმნა სახასიათო კოსტიუმების გარეშე წარმოუდგენელი იქნებოდა. კოსტიუმები დიზაინერებმა ნაილა დიქსონმა და რიჩარდ ტეილორმა მე-17 და მე-18 საუკუნეების შთაგონებით შექმნეს და დაუვიწყარი სანახაობაც გვაჩუქეს.

4. Memoirs Of A Geisha / გეიშას მემუარები (2006)

ფილმში იაპონელი გეიშების ყოველდღიურობის დასახატად დიზაინერმა კოლინ ეტვუდმა ბევრი იშრომა: ის მუზეუმებში დადიოდა, წიგნებს ათვალიერებდა და აზრს იაპონიის ექსპერტებს ეკითხებოდა. ფილმში კიმონოები აბრეშუმისგანაა დამზადებული, ორნამენტები კი ხელითაა მოქარგული. ამასთან, თითოეულ პერსონაჟს საკუთარი ფერების პალიტრა აქვს, რაც მათი პიროვნებისა და ხასიათის გამოხატვას ემსახურება.

5. Marie Antoinette / მარი ანტუანეტი (2007)

სოფია კოპოლას ფილმისთვის დიზაინერმა მილენა კანონერომ მე-18 საუკუნის ეპოქისთვის დამახასიათებელი ჩაცმულობის სტილითა და დიორისთვის ჯონ გალიანოს მიერ შექმნილი დიზაინებით იხელმძღვანელა. თვალისმომჭრელი კოსტიუმების წყალობით დიზაინერმა დამსახურებული ოსკარი მოიპოვა.

6. Elizabeth: The Golden Age / ელიზაბეთი: ოქროს ხანა (2008)

დედოფალი ელიზაბეთის დამაჯერებლად დასახატად დიზაინერმა ალექსანდრა ბაირნმა დედოფლის რეალური ჩაცმულობით იხელმძღვანელა, თუმცა გადაწყვიტა, სამოსისთვის რეალურისგან განსხვავებული ფერების პალიტრა გამოეყენებინა, რათა ელიზაბეთი სხვა პერსონაჟებისგან გამორჩეული ყოფილი.

7. The Great Gatsby / დიდი გეტსბი (2014)

დეიზის დაუვიწყარი სტილი კარნავალებზე დღემდე დიდი პოპულარულობით სარგებლობს და სამართლიანადაც. დიზაინერმა კეტრინ მარტინმა ფილმისთვის კოსტიუმები 1920-იანი წლების შთაგონებით შექმნა, რათა აღნიშნული ეპოქა ეკრანზე დამაჯერებლად გაეცოცხლებინა, რაც მშევნივრად გამოუვიდა.

8. The Grand Budapest Hotel / სასტუმრო გრანდ ბუდაპეშტი (2015)

უეს ანდერსონის დეტალებისადმი ყურადღებას თუ გავითვალისწინებთ, გასაკვირი არაა, რომ მისი ერთ-ერთი ყველაზე წარმატებული ფილმი კოსტიუმების დიზაინითაც გამოირჩევა. ფილმის კოსტიუმებზე იტალიელმა მილენა კანონერომ იმუშავა. მან დაუვიწყარი სამოსის შესაქმნელად ისეთ გავლენიან ბრენდებთან ითანამშრომლა, როგორებიცაა ფენდი და პრადა.

9. Mad Max: Fury Road / შეშლილი მაქსი: მრისხანების გზა (2016)

საუკეთესო კოსტიუმების დიზაინისთვის ათჯერ ნომინირებულმა ჯენი ბივენმა მაყურებლებს იმედი არ გაუცრუა და თვალისმომჭრელი კადრებითა და დასამახსოვრებელი სიუჟეტით გამორჩეული ფილმისთვის დაუვიწყარი კოსტიუმები შექმნა.

10. Black Panther / შავი პანტერა (2019)

შავი პანტერას დიზაინერი რუთ კარტერი პირველი აფრიკელი ამერიკელი ქალია, რომელმაც საუკეთესო კოსტიუმის დიზაინის ნომინაციაში გაიმარჯვა და დამსახურებულადაც. კოსტიუმები ტრადიციული აფრიკული ტომების ნამდვილი ტანსაცმლისა და აქსესუარების შთაგონებითაა შექმნილი, რაც ფილმს კიდევ უფრო საუცხოო ელფერს სძენს.