საქართველოს ახალგაზრდა იურისტთა ასოციაციის განცხადებით, ხელოვნების მუზეუმის ყოფილმა ხელმძღვანელმა, ეკა კიკნაძემ თეა წულუკიანისა და მუზეუმის დირექტორატის წინააღმდეგ სახალხო დამცველს დისკრიმინაციის დადგენის თაობაზე მიმართა.

"2022 წლის 22 თებერვალს ეკატერინე კიკნაძემ საჩივრით მიმართა სახალხო დამცველს და მოითხოვა მინისტრის, სსიპ — საქართველოს ეროვნული მუზეუმის დირექტორატისა და მისი ოთხი წევრის მიერ განსხვავებული შეხედულებების გამო დისკრიმინაციული მოპყრობის ფაქტის დადგენა და დისკრიმინაციული მოპყრობის აღმოფხვრა.

აღსანიშნავია, რომ ეკატერინე სხვა კოლეგებთან ერთად არის ხელმომწერი და ორგანიზაორი 2021 წლის აგვისტოსა და დეკემბერში მომზადებული პეტიციებისა, რომლებიც უკავშირდებოდა ხელოვნების მუზეუმის ირგვლივ არსებულ უმნიშვნელოვანეს საკითხებს. მუზეუმის ახალი ადმინისტრაციის მხრიდან, პეტიციების ხელმომწერთა დევნა კი, რეორგანიზაციის შედეგებში ნათლად გამოჩნდა.

ეკატერინე კიკნაძის ინტერესებს თბილისის საქალაქო სასამართლოსა და სახალხო დამცველის აპარატში საია წარმოადგენს", — აცხადებენ ორგანიზაციაში.

კიკნაძე 2021 წლის 31 ივლისს ლაბორანტის პოზიციაზე გადაიყვანეს. მანამდე ის მუზეუმის მმართველი იყო. როგორც კიკნაძე საუბრობდა, ეს მას შემდეგ მოხდა, რაც ევაკუაციის ახალი გეგმის გაცნობა მოითხოვა. მან 31 იანვარს განაცხადა, რომ ლაბორანტის პოზიციიდანაც გაათავისუფლეს, კიკნაძის თქმით, ორ კვირაზე მეტია გათავისუფლებულია, თუმცა ეს მხოლოდ მას შემდეგ გაიგო, რაც ნახევარი თვის ხელფასი, 165 ლარი ჩაურიცხეს.