ევროკავშირი რუსეთის წინააღმდეგ ახალ სანქციებზე იმსჯელებს. ამის შესახებ ევროკომისიისა და ევროპული საბჭოს პრეზიდენტების საერთო განცხადებაშია ნათქვამი. ისინი რუსეთის მიერ თვითგამოცხადებული ლუგანსკისა და დონეცკის "დამოუკიდებელ რესპუბლიკებად" აღიარებას უკანონოსა და მიუღებელს უწოდებენ.

"ორივე პრეზიდენტი მიესალმება წევრი სახელმწიფოების ურყევ ერთიანობას და მათ გადაწყვეტილებას, რომ რუსეთის უკანონო ქმედებებზე პარტნიორებთან მჭიდრო კოორდინაციით რეაგირება მოახდინონ", — აღნიშნულია განცხადებაში.

განცხადებაში ნათქვამია, რომ პაკეტი მოიცავს ისეთ წინადადებებს, რომლის მიხედვითაც სანქციები შეეხება ყველას, ვინც ამ უკანონო გადაწყვეტილებაში მონაწილეობდა, ბანკებს, რომლებიც აფინანსებენ ჯარს და სხვა ოპერაციებს ამ ტერიტორიებზე, ასევე, ვაჭრობას ევროკავშირსა და უკრაინის ოკუპირებულ რეგიონებს შორის. პრეზიდენტები აღნიშნავენ, რომ ეკონომიკური შედეგებით მათ უკანონო და აგრესიულ ქმედებებზე პასუხისმგებლობა უნდა იგრძნონ.

რუსეთის წინააღმდეგ ახალ სანქციებზე ევროკავშირის საგარეო საქმეთა მინისტრები დღეს არაფორმალურად ხვდებიან ერთმანეთს და სანქციების პირველ პაკეტს ოფიციალურად მოგვიანებით წარადგენენ.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჟღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურნენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტროს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გააგზავნიან ჯარებს.