ჰოლანდიური ავიაკომპანია KLM-ის განცხადებით, უკრაინის მიმართულებით ფრენებს უსაფრთხოების მიზეზით აუქმებს. კომპანიაში ამბობენ, რომ პირველ ადგილზე მგზავრებისა და პერსონალის უსაფრთხოებას აყენებენ.

"KLM უკრაინაში ფრენებს წყვეტს. შემდეგი რეისი კიევში დღეს საღამოს იყო დაგეგმილი, მაგრამ არ განხორციელდება. ეს გადაწყვეტილება მიღებულია მოგზაურობის შესახებ წითელი ფერის გაფრთხილებისა და უსაფრთხოების სიღრმისეული ანალიზის შედეგად. ჯერჯერობით უცნობია, როდის განაახლებს KLM ფრენებს კიევში", — ვკითხულობთ განცხადებაში.

უკრაინის პრეზიდენტის ოფისის ხელმძღვანელის მოადგილის, კირილ ტიმოშენკოს განცხადებით, ხელისუფლებას უკრაინის საჰაერო სივრცის დახურვის შესახებ გადაწყვეტილება არ მიუღია და შესაბამისი რეკომენდაცია არც ევროპის საავიაციო სააგენტოს გაუცია.

უკრაინის რადას დეპუტატის, ალექსეი გონჩარენკოს განცხადებით კი, სავარაუდოდ, ხვალიდან, 14 თებერვლიდან უკრაინის თავზე საჰაერო მიმოსვლა შეწყდება. ამის შესახებ მან Facebook-ზე დაწერა.

უკრაინაში საფრთხის ზრდის პარალელურად, არაერთმა ქვეყანამ უკვე მოუწოდა საკუთარ მოქალაქეებს დატოვონ ქვეყანა. 11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა თქვა, რომ რუსეთი უკრაინაში, შეიძლება, ნებისმიერ დროს შეიჭრას.

უკრაინის საგარეო საქმეთა სამინისტრომ გუშინ, 12 თებერვალს გაავრცელა განცხადება, სადაც ნათქვამია, რომ ახლა ქვეყნისთვის კრიტიკულად მნიშვნელოვანია სიმშვიდის შენარჩუნება, ერთიანობა, ისეთი ქმედებებისგან თავის შეკავება, რომელიც სტაბილურობას ძირს უთხრის და თესავს პანიკას.

უკრაინაში მყოფი საქართველოს მოქალაქეებისთვის კი ცხელი ხაზია ამოქმედებული. საგარეო საქმეთა სამინისტრო მოქალაქეებს მოუწოდებს, კავშირზე დარჩნენ საქართველოს საელჩოსთან უკრაინაში.