მსახიობმა, იოსებ ხვედელიძემ თუმანიშვილის თეატრი დატოვა. მიზეზად ის საკუთარი შეხედულებების გამო, თეატრის მხრიდან "სასჯელის" დაწესებას ასახელებს.

როგორც ხვედელიძე ამბობს, 2017 წლის შემდეგ მისი მონაწილეობით ყველა სპექტაკლი ჩაიხსნა და ანაზღაურება, ფაქტობრივად, გაუნულდა. მისივე თქმით, ბოლოს ხელფასიდან მხოლოდ 7 ლარი ჩაერიცხა.

On.ge-სთან საუბრისას ხვედელიძემ განაცხადა, რომ "სასჯელი" მას თეატრის მართვასთან დაკავშირებული განსხვავებული შეხედულებების გამო დაუწესეს.

"ჩარიცხული თანხის ნაწილი იქვითებოდა ჯანმრთელობის დაზღვევაზე. წლების განმავლობაში დაზღვევის ფასის ზრდასთან ერთად, ხელზე ასაღები თანხის ოდენობა მცირდებოდა. განახლებული სადაზღვევო პოლისის შემდეგ კი, "დარჩენილმა" თანხამ შეადგინა მხოლოდ 7 ლარი. დიდი მადლობა თეატრს დზღვევისთვის", — წერს ის.

მსახიობმა თეატრის დირექტორს, ზურაბ გეწაძესა და სამხატვრო ხელმძღვანელს, გიორგი სიხარულიძეს თეატრის დატოვების შესახებ 5 იანვარს მიმართა. განცხადებაში აღნიშნავს, რომ არსებობს მოსაზრება, თითქოს, ის ყველა შემოთავაზებულ როლზე უარს ამბობს. თუმცა მსახიობი ხაზს უსვამს, რომ თეატრში ყოფნის 13 წლის მანძილზე ასეთი შემთხვევა მხოლოდ 3-ჯერ და ყველა შემთხვევაში, ობიექტური მიზეზების გამო მოხდა.

ხვედელიძის თქმით, თემაზე საჯაროდ საუბარი იმიტომ გადაწყვიტა, რომ წლების მანძილზე თეატრს მასთან დიალოგის სურვილი არცერთხელ გამოუთქვამს და ეს ინიციატივა მხოლოდ მას შემდეგ გამოიჩინა, რაც მან შრომითი ურთიერთობების შესახებ განცხადება დაწერა. თუმცა ხვედელიძე აღნიშნავს, რომ არსებული უსამართლობის ფონზე, დიალოგის რესურს ვერ ხედავდა და შეთავაზებაზე უარი თქვა.

ამასთან, ამბობს, რომ განცხადების დაფაზე განთავსება მოითხოვა, რადგან წასვლის მიზეზები კოლეგებს სცოდნოდათ თუმცა, ასე არ მოხდა.

"ცხადია, აქ არ დასრულდება ამ თემაზე მსჯელობა და ყოველთვის მოძებნიან თავის გასამართლებლად არგუმენტებს. ძალიან მტკივნეული და უიმედოა ამ სამარცხვინო დეტალების ჩამოთვლა. შესაბამისად, თავს აღარ შეგაწყენთ. ვუსურვებ ყველას წარმატებას. დიდი მადლობა, ჩემს მეგობრებს და კოლეგებს ერთად გატარებული წლებისთვის. იმედია სწორად გაიგებთ ამ იძულებითი გადაწყვეტილების მიზეზს", — წერს ის.

დამატებითი ინფორმაციისთვის On.ge თუმანიშვილის თეატრთან დაკავშირებას ცდილობს, პასუხს მიღებისთანავე შემოგთავაზებთ.