NATO-ს გენერალური მდივანი, იენს სტოლტენბერგი ნორვეგიის ცენტრალურ ბანკს უხელმძღვანელებს. ამის შესახებ ინფორმაციას საერთაშორისო მედია, მათ შორის, Reuters ავრცელებს.

გამოცემის ცნობით, ოპოზიცია წუხს, რომ ყოფილი პრემიერმინისტრის დანიშვნამ, შესაძლოა, ბანკის დამოუკიდებლობა შეასუსტოს. სტოლტენბერგს ალიანსში უფლებამოსილების ვადა პირველ ოქტომბერს ეწურება. Norges Bank-ში აცხადებენ, რომ ახალ ხელმძღვანელს დეკემბრის თვიდან ელოდებიან.

სტოლტენბერგი პასუხისმგებელი იქნება საპროცენტო განაკვეთების დაწესებასა და ფინანსური სტაბილურობის მართვაზე. ამასთან, ის ზედამხედველობას გაუწევს ნორვეგიის სუვერენული სიმდიდრის ფონდს, რომელიც აქტივებით მსოფლიოში უდიდესია და 1,4 ტრილიონ დოლარს შეადგენს.

სტოლტენბერგი განათლებით ეკონომისტია. ის ნორვეგიის ლეიბორისტული პარტიის ყოფილი ლიდერია, ხოლო 2000-2001 2005-2013 წლებში ნორვეგიის პრემიერმინისტრი იყო. მომდევნო წელს ის NATO-ს ხელმძღვანელი გახდა.

მთავრობის განცხადებით, მანამ, სანამ სტოლტენბერგი ჩრდილოატლანტიკურ ალიანსში დარჩება, ნორვეგიის ცენტრალური ბანკის ხელმძღვანელის მოვალეობას ბანკის უფროსის მოადგილე და მის მთავარ მოწინააღმდეგედ მიჩნეული, უოლდერ ბაჩე შეასრულებს.

იმან, არის თუ არა სტოლტენბერგი თანამდებობისთვის ყველაზე შესაფერისი კანდიდატურა, ნორვეგიაში დებატები გამოიწვია. მისი მხარდამჭერები ამბობენ, რომ მას ლიდერობის მრავალწლოვანი გამოცდილება აქვს — საპასუხოდ, მოწინააღმდეგეების თქმით, ეს მთავრობისგან ბანკის დამოუკიდებლობის შესახებ გააჩენს კითხვებს.