საქართველოს ეროვნული მუზეუმის განცხადებით, მათ გაერთიანებაში შემავალი მუზეუმებიდან, მათ შორის ხელოვნების მუზეუმიდან, არც ერთი ექსპონატი არ დაკარგულა. როგორც ისინი განმარტავენ, ეროვნული მუზეუმის მიმართ დღეს ისმის უსაფუძვლო ბრალდება "დაკარგულ" ექსპონატებთან დაკავშირებით, რაც მათი თქმით, სიმართლეს არ შეესაბამება.

"საზოგადოების მაღალი ინტერესიდან გამომდინარე გვსურს კიდევ ერთხელ განვმარტოთ, რომ ეროვნული მუზეუმის შექმნის დღიდან, ჩვენს გაერთიანებაში შემავალი მუზეუმებიდან, მათ შორის ხელოვნების მუზეუმიდან, არც ერთი ექსპონატი არ დაკარგულა.

ეროვნული მუზეუმის მიმართ დღეს ისმის უსაფუძვლო ბრალდება "დაკარგულ" ექსპონატებთან დაკავშირებით. სინამდვილეში ექსპონატები სხვადასხვა მიზეზით გატანილია ეროვნული გალერეიდან 1950-იანი წლებიდან 2005 წლამდე, იმ დროს სანამ ეროვნული გალერეა საქართველოს ეროვნული მუზეუმის გაერთიანების ნაწილი გახდებოდა", — ვკითხულობთ განცხადებაში.

როგორც მუზეუმში ამბობენ, სხვადასხვა საელჩოში ექსპონატები ეროვნული გალერეიდან 1992-2005 წლებშია გატანილი. მუზეუმის მიერ გამოქვეყნებული დოკუმენტების მიხედვით, ამ დროისათვის, საელჩოებში გატანილი ექსპონატებიდან 18 ადგილზეა, 59 კი არ იძებნება. დოკუმენტში ვკითხულობთ, რომ ყველაზე მეტი, 46 ექსპონატი ამერიკის შეერთებულ შტატებში საქართველოს საელჩოში არ იძებნება, 11 ირანის, ხოლო 2 თურქეთის საელჩოში.

მათივე ცნობით, ეროვნული გალერეის კოლექციებში უკვე დაბრუნებულია 552 ექსპონატი (ფერწერა, გრაფიკა, ქანდაკება, დეკორატიულ-გამოყენებითი ხელოვნება), მათ შორის, ლადო გუდიაშვილის, ელენე ახვლედიანის, ნათელა იანქოშვილის და სხვა ავტორების ნამუშევრები.

"ეროვნული მუზეუმი დღემდე მუშაობს მუზეუმებიდან საქართველოს დიპლომატიურ წარმომადგენლობებში, სახელმწიფო ორგანიზაციებსა და კერძო პირებზე გაცემული ექსპონატების მუზეუმებში დაბრუნების პროცესზე. ეროვნული მუზეუმის გუნდის მიერ ეროვნული გალერეის ფონდებს უკვე დაუბრუნდა დროებით გაცემული 552 ექსპონატი, ხელოვნების მუზეუმის ფერწერის ფონდს კი 5", — წერია ეროვნული მუზეუმის მიერ გამოქვეყნებულ განცხადებაში.

23 იანვარს პირველი არხისთვის მიცემულ ინტერვიუში კულტურის მინისტრმა თეა წულუკიანმა თქვა, რომ როდესაც ხელოვნების მუზეუმში ინვენტარიზაცია დასრულდება, დაკარგული ექსპონატების შესახებ მასალები საგამოძიებო უწყებას გადაეცემა. მან აღნიშნა, რომ მაგალითად, როდესაც ფერწერის ფონდს ნინო ხუნდაძე ხელმძღვანელობდა, 21 ექსპონატი დაიკარგა.

ჟურნალისტის კითხვას, რომ მისი ოპონენტების განცხადებების მიხედვით, ეს ექსპონატები ჯერ კიდევ საბჭოთა პერიოდში, 90-იან წლებში დაიკარგა და არ არის მართებული კურატორების დადანაშაულება, წულუკიანმა უპასუხა, რომ ამას გამოძიება დაადგენს და იქვე დაამატა:

"როდესაც ნინო ხუნდაძე ნაციონალების დროს მოვიდა მუზეუმში, მას მინიმუმ ის ევალებოდა და ეს იცის სტუდენტმაც და არა მხოლოდ მაღალკვარიფიციურმა პროფესიონალმა, რომ, როდესაც ფონდს იბარებ, იქ უნდა ჩაატარო ინვენტარიზაცია და მოიძიო დაკარგული რაც არის".

ამ ინტერვიუმდე, 2021 წლის 3 დეკემბერს, წულუკიანმა პარლამენტში თქვა, რომ 2012 წლამდე საელჩოებისთვის გადაცემული 117 ექსპონატიდან, 53 სავარაუდოდ დაკარგულია.