ეროვნულ-დემოკრატიული ინსტიტუტის (NDI) კვლევის მიხედვით, გამოკითხული მოსახლეობის 42% აცრას არ აპირებს. 25% ამბობს, რომ აიცრებოდა, ხოლო 29% აცხადებს, რომ ვაქცინა უკვე გაიკეთა.

მოსახლეობის უმრავლესობა დარწმუნებულია, რომ ვაქცინაციის შესახებ საკმარისი ინფორმაცია აქვს. 2021 წლის ივლისში ასე გამოკითხულთა 54% ფიქრობდა, ეს რიცხვი დეკემბრის თვეში 64%-მდე გაიზრდა.

კვლევის თანახმად, ვაქცინის მიმართ სკეპტიკურად განწყობილი ადამიანების 38% მიზეზად ვაქცინის ხარისხის მიმართ უნდობლობას ასახელებს, 20% კი ჯანმრთელობის პრობლემებს. 15% ამბობს, რომ კორონავირუსის პანდემიას ვაქცინაციის გარეშეც გაუმკლავდება.

გარდა ამისა, ვაქცინირებული მოსახლეობის მესამედი ბუსტერ დოზის გაკეთებას არ აპირებს. 63% ამბობს, რომ ბუსტერი უკვე გაიკეთა, 14% აცხადებს, რომ ბუსტერ დოზით არ აიცრება. გამოკითხულთა 3%-ის თქმით, ბუსტერ დოზით უკვე აიცრა, ხოლო 20% ამბობს, რომ არ იცის გაიკეთებს თუ არა ვაქცინის ბუსტერ დოზას.

NDI-ის მიერ ჩატარებული კვლევი მიხედვით, მოსახლეობის უმრავლესობა ბავშვების კორონავირუსის საწინააღმდეგო ვაქცინით აცრის წინააღმდეგია. კითხვაზე, აცრიდით თუ არა თქვენს შვილს კორონავირუსის საწინააღმდეგო ვაქცინით, 59% ამბობს, რომ — არა, 26% აცხადებს, რომ — კი. გამოკითხულთა 1%-მა თქვა, რომ შვილი უკვე აცრა, ხოლო 15% ამბობს, რომ — არ იცის.

გარდა ამისა, კვლევის თანახმად, ჯანდაცვის სისტემას სრულად გამოკითხულთა 23%, ხოლო ნაწილობრივ, 50% ენდობა. ჯანდაცვის სისტემის მიმართ ნაწილობრივ უნდობლობას 11% გამოხატავს, ხოლო 14% ამბობს, რომ მას საერთოდ არ ენდობა.

ორგანიზაციის განცხადებით, მოსახლეობის ნახევარი მთავრობის მიერ პანდემიის მართვას დადებითად აფასებს.

ამავე კვლევის მიხედვით, მოსახლეობის უმრავლესობის აზრით, პანდემიასთან დაკავშირებით ყველაზე უარესი ჯერ კიდევ წინ არის.

საზოგადოების განწყობის კვლევა საქართველოში NDI-ის დაკვეთით, CRRC საქართველოს მიერ ჩატარდა.

აღნიშნული კვლევა 2021 წლის 7-13 დეკემბრის პერიოდში საქართველოს მასშტაბით 2,099 სატელეფონო ინტერვიუს წარმომადგენლობითი შერჩევის საფუძველზე, ქვეყნის სრულწლოვან მოსახლეობას შორის (ოკუპირებული ტერიტორიების გამოკლებით) ჩატარდა. გამოკითხვის საშუალო ცდომილების ზღვარი +/- 1,4%-ია. რესპონდენტები შემთხვევით ნომერზე დარეკვის მეთოდით შეირჩნენ.