სახელმწიფო უწყებები აგრძელებენ კონტრაქტების გაფორმებას ისეთ მედიებთან, რომლებიც სიძულვილის ენას და ანტიდასავლურ განწყობებს აღვივებენ. ამის შესახებ ინფორმაცია მოცემულია მედიის განვითარების ფონდის (MDF) ანგარიშში "მედიის ფინანსური გამჭვირვალობა 2016". MDF-ის ცნობით, ერთ-ერთი ასეთი გამოცემა პრორუსულ პარტია "ცენტრისტებთან” დაკავშირებული ორგანიზაციაა.

MDF-ის ინფორმაციით, ღიად პრორუსულ მედია საშუალებასთან, რომელიც დეზინფორმაციისა და რუსული პროპაგანდის ტირაჟირებას ახდენს, სასჯელაღსრულებისა და პრობაციის სამინისტრომ 2016 წელს 3 000 ლარის ღირებულების კონტრაქტი, ხოლო 2017 წელს 3387 ლარის ღირებულების კონტრაქტი გაუფორმა. 2016 წლის კონტრაქტს ხელი სამინისტროს მხრიდან მინისტრის მოადგილე ბესიკ დევდარიანმა, ხოლო 2017 წელს მინისტრის მოადგილე თეიმურაზ მღებრიშვილმა მოაწერეს.

ფოტო: MDF

ხელშეკრულების საგნად მითითებულია ახალი ამბების სააგენტოს მომსახურების შეძენა. მოძიებული მასალების მიხედვით, სამინისტრო "თბილისი 24”-ის ვებ-საიტზე უწყებების ცალკეული აქტივობებსა და მინისტრის კომენტარებს ათავსებს.

მედიის განვითარების ფონდის ცნობით, საინფორმაციო სააგენტო შპს "თბილისი 24"-ის მფლობელები გოჩა ნაჭყებია (50%) და მაია შაიშმელაშვილი (50%) არიან. გოჩა ნაჭყებია, პარტია "ცენტრისტების" ერთ-ერთ ლიდერთან, ვლადიმერ ბედუკაძესთან დაკავშირებული პირია.