მიხეილ სააკაშვილის მდგომარეობა სტაბილურია და ამ ეტაპზე გართულებები არ აქვს. ამის შესახებ ინფორმაციას ენდოკრინოლოგი ელენე გიორგაძე ავრცელებს, რომელიც მთელი დღის განმავლობაში გორის სამხედრო ჰოსპიტალში, ექსპრეზიდენტთან იმყოფებოდა.

"დღეს წნევა ჰქონდა სტაბილური, ისე, რომ არც ერთხელ არ დაგვჭირდა არანაირი პრეპარატის დამატება [...] ყველაზე მეტად გვეშინოდა პირველი სამი დღის. გართულებები ახლა ნამდვილად არ აქვს", — განაცხადა გიორგაძემ.

მასთან ერთად, სააკაშვილის მდგომარეობას მთელი დღის განმავლობაში აკვირდებოდა რეანიმატოლოგი ინეზა სულამანიძეც.

"მისი მდგომაროება არის სტაბილური. ის ყველა იმ დატვირთვას, რასაც ქალბატონი ელენეს რეკომენდაციით ვაძლევთ, ყველაფერს იტანს [...] ქალბატონი ელენეს მეთვალყურეობით, ის აკონტროლებს ყველა ულუფას, საათობრივად, შემადგენლობას, დამზადების ტექნოლოგიას და ა.შ. რამდენიმე დღე, რასაკვირველია, საყურადღებოა", — განაცხადა სულამანიძემ გორის სამხედრო ჰოსპიტალის დატოვების შემდეგ.

მისივე ინფორმაციით, სააკაშვილის პალატის ფანჯრის გაღების საშუალება აქვს. იქამდე ვრცელდებოდა ინფორმაცია, რომ ბადრაგი მას ფანჯრის გაღების საშუალებას არ აძლევდა.

როგორც გიორგაძე, ისე სულამანიძე ხვალ დილიდან ისევ გააგრძელებენ გორის სამხედრო ჰოსპიტალში მიხეილ სააკაშვილის ჯანმრთელობის მონიტორინგს.

19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.