ქართული ოცნების დეპუტატი, გიორგი ხელაშვილი ქართულ მედიას აკრიტიკებს და მათ მოუწოდებს, რომ ჟურნალისტის პროფესია დაიბრუნონ. ამის შესახებ მან პარლამენტის პლენარულ სხდომაზე ისაუბრა.

"რაც შეეხება პოლიტიზებულ მედიას, მოვუწოდებ, გაითვალისწინონ საერთაშორისო თანამეგობრობის აზრი და დაიბრუნონ ჟურნალისტის პროფესია, ნუღარ წაშლიან ზღვარს ტელევიზიებსა და პოლიტიკურ პარტიებს შორის, რადგან ქართულ დემოკრატიას მიუკერძოებელი და პროფესიონალური ჟურნალისტიკა სჭირდება და არა პოლიტიკური პარტიების მიერ მართული პროპაგანდისტული მანქანები", — ამბობს ის.

მან გააკრიტიკა არასამთავრობო ორგანიზაციებიც და თქვა, რომ მათი საქმიანობა მიუმხრობლობის და ობიექტურობის პრინციპებს უნდა ემყარებოდეს.

"მათ ვურჩევ სერიოზულად მოეკიდონ საერთაშორისო დამკვირვებლების კრიტიკას. თუ სამოქალაქო საზოგადოების ზოგიერთი ორგანიზაცია გააგრძელებს მუშაობას, როგორც პოლიტიკური აქტივისტების ჯგუფი, სამწუხაროდ, მათი წვლილი ქართული დემონსტრატიის განვითარებაში სერიოზული კითხვის ნიშნის ქვეშ დადგება, ხოლო ხალხის მიერ მათ მიმართ ნდობის ხარისხის იმაზე დაბლა დაიწევს, ვიდრე აქამდე იყო", — განაცხადა ხელაშვილმა.

30 ოქტომბერს საქართველოში ადგილობრივი თვითმმართველობის არჩევნები ჩატარდა. ცესკომ წინასწარი შედეგები გამოაქვეყნა, რის მიხედვითაც წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.

შედეგებთან დაკავშირებით განცხადება გააკეთა ოპოზციის თბილისის მერობის კანდიდატმა თბილისში, ნიკა მელიამ და არჩევნებს "გაუქმებული" უწოდა. მისი თქმით, ბევრ მუნიციპალიტეტში ოპოზიციის მოპოვებული გამარჯვება ქართული ოცნების დამფუძნებელმა, ბიძინა ივანიშვილმა მოიპარა და "ვითომც არ იყო მოპოვებული ისე წაიღო, საკუთარ სხვადასხვა რეზიდენციებში".

ამის შემდეგ, ოპოზიციამ აქციები დააანონსა მთელი საქართველოს მასშტაბით. დღეს, 2 ნოემბერს ოპოზიციის მხარდამჭერები ბათუმსა და რუსთავში შეიკრიბებიან. ხვალ კი აქცია იქნება ზუგდიდშიც. რაც შეეხება დედაქალაქს, თბილისში აქცია 6 ნოემბერს ჩატარდება.