რუსეთის პრეზიდენტი ვლადიმერ პუტინი ირწმუნება, რომ მისი ქვეყანა ბუნებრივ აირს, როგორც იარაღს ევროპის წინააღმდეგ არ იყენებს და რომ რუსეთი მზად არის დაეხმაროს რეგიონს, რადგან მისი ენერგეტიკული კრიზისი გრძელდება.

"ჩვენ არ ვიყენებთ [გაზს] იარაღად. ცივი ომის ყველაზე მძიმე პერიოდებშიც კი რუსეთმა რეგულარულად შეასრულა თავისი სახელშეკრულებო ვალდებულებები და გაზი მიაწოდა ევროპას", — განაცხადა პუტინმა 13 ოქტომბერს CNBC-თან მოსკოვში.

რაც შეეხება ბრალდებებს იმის შესახებ, რომ ენერგეტიკული კრიზისის პირობებში რუსეთი დაკისრებულ ვალდებულებებს არ ასრულებს, პუტინი ასეთ ბრალდებებს პოლიტიკურად მოტივირებულს უწოდებს. მისი მტკიცებით, ბუნებრივი აირის პოლიტიკურ ბერკეტად გამოყენებაზე ბრალდება სიმართლეს არ შეესაბამება.

არაერთი სახელმწიფო წლებია საუბრობს იმაზე, რომ კრემლს გაზის მიწოდების საკითხი სასურველი პოლიტიკური შედეგის მისაღებად არაერთხელ გამოუყენებია.

2006-2007 წლებში საქართველოსთვის გაზის ფასის გაძვირების გარდა, რუსეთისგან საქართველოს ენერგობლოკადაც ახსოვს. კრემლმა საქართველოს მიმართ სრულმასშტაბიანი ეკონომიკური ბლოკადის გატარება 2005 წლიდან დაიწყო.

ენერგობლოკადის შემდეგ, თბილისმა გადაწყვიტა, რომ რუსულ ბუნებრივ აირზე ერთხელ და სამუდამოდ ეთქვა უარი და საქართველომ გაზის იმპორტი აზერბაიჯანიდან დაიწყო.