ბათუმში, ნანგრევებიდან ამოყვანილი ქალის მდგომარეობა კვლავ კრიტიკულად მძიმეა. ის რეანიმაციულ განყოფილებაში, მართვით სუნთქვაზე იმყოფება.

"სრული კვლევა ჩაუტარდა. პოლიტრავმა აღინიშნება, მრავლობითი მოტეხილობა აქვს, ასევე, მრავლობითი შინაგანი დაზიანებები, დაჟეჟილობები, გადაყვანილია რეანიმაციულ განყოფილებაში და კვლავ უკიდურესად მძიმე რჩება პაციენტის მდგომარეობა", — უთხრეს On.ge-ს ბათუმის რეფერალურ საავადმყოფოში.

კლინიკის ინფორმაციით, იმის გამო, რომ ქალის მდგომარეობა მძიმეა, ქირურგიული ჩარევა ვერ ტარდება, გაუმჯობესების შემდეგ კი მოტეხილობებზე იგეგმება ოპერაცია.

მაშველებმა ბათუმში, საცხოვრებელი კორპუსის ნანგრევებიდან ქალი დაახლოებით ერთი საათის წინ გამოიყვანეს. ის სასწრაფო სამედიცინო დახმარების ბრიგადამ საავადმყოფოში გადაიყვანა. მისი მდგომარეობა უკიდურესად მძიმედ ფასდება.

დღეს, 8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები თითქმის 11 საათია ცდილობენ ნანგრევების ქვეშ მოყოლილი ადამიანების ამოყვანას. შინაგან საქმეთა მინისტრის, ვახტანგ გომელაურის ინფორმაციით, ნანგრევებში დაახლოებით 10-15 ადამიანი უნდა იყოს, რომელთაგან კონტაქტზე 2 გამოდიოდა.

მსხვერპლის შესახებ ინფორმაცია, ჯერჯერობით, არ ვრცელდება. ამ დრომდე უცნობია ნგრევის მიზეზიც.

რამდენიმე საათის წინ, კლინიკიდან გაწერეს ბავშვი, რომელიც კორპუსის ნგრევისას მის წინ მდებარე მანქანაში იყო და ნანგრევებს შორის მოყვა. ბათუმის იაშვილის კლინიკის მთავარი ექიმის, თამარ ბახტაძის ინფორმაციით, წვივის ძვლის მოტეხილობა და ზედაპირული დაზიანებები აქვს.

გაიგე მეტი: