პენიტენციური სამსახურის განცხადებით, მსჯავრდებულ მიხეილ სააკაშვილის ჯანმრთელობის მდგომარეობა დამაკმაყოფილებელია. მათივე ინფორმაციით, ის თავს კარგად გრძნობს და არ აქვს ჩივილები.

"სააკაშვილი პირველადი ჯანდაცვის გუნდის მუდმივი მეთვალყურეობის ქვეშ იმყოფება. დაწესებულებაში შემოსახლებისთანავე მას გარეგნული დათვალიერება, პირველადი სამედიცინო შემოწმება ჩაუტარდა და ამბულატორიული პაციენტის სამედიცინო ბარათი შეივსო.

დაწესებულებაში განთავსების შემდეგ, მსჯავრდებულს ჩაუტარდა კლინიკო-ლაბორატორიული/ინსტრუმენტული გამოკვლევები: ასევე, ჩაუტარდა ოჯახის ექიმისა და სხვა პროფილის ექიმი — სპეციალისტების (მათ შორის სამოქალაქო სექტორის მედიკოსების) კონსულტაციები. საჭიროების მიხედვით კიდევ რამდენიმე კონსულტაციის ჩატარებაა დაგეგმილი", — ნათქვამია განცხადებაში.

მათივე ცნობით, სააკაშვილს ამჟამად უტარდება მკურნალობა დანიშნული მედიკამენტებით, მათ შორის მის მიერ წარმოდგენილი მედიკამენტებით, რომელიც, მიხეილ სააკაშვილის გადმოცემით, მისი ოჯახის ექიმის მიერ არის დანიშნული. პენიტენციურ სამსახურში, ასევე, ამბობენ, რომ სააკაშვილს საჭიროების შემთხვევაში მედიკამენტები სიმპტომურადაც ეძლევა.

მიხეილ სააკაშვილის ადვოკატის, ბექა ბასილაიას განცხადებით, ექსპრეზიდენტს 12 კილოგრამი აქვს დაკლებული.

ექსპრეზიდენტმა, მიხეილ სააკაშვილმა შიმშილობა პირველ ოქტომბერს N12 პენიტენციურ დაწესებულებაში განთავსების დღეს გამოაცხადა.

ამავე თემაზე: