ბეჭდების მბრძანებლის ვარსკვლავი ელაიჯა ვუდი ცოტა ხნის წინ მსახიობ დექს შეპარდის პოდკასტში სტუმრად იყო მიწვეული. საუბრისას ელაიჯამ აღნიშნა, რომ ტრილოგიისთვის ერთ-ერთი ორკის კოსტიუმი ჰარვი ვაინშტაინის მიხედვით შექმნეს.

ვუდმა პოდკასტში აღნიშნა, რომ ტრილოგიის რეჟისორი პიტერ ჯექსონი ბეჭდების მბრძანებლის გადასაღებად გეგმებს წლების განმავლობაში აწყობდა. ტოლკინის წიგნებზე საავტორო უფლებები ჰარვი ვაინშტაინის სტუდია Miramax-ს ეკუთვნოდა. ჯექსონსა და ვაინშტაინს შორის მალე უთანხმოება მოხდა: ვაინშტაინი ჯექსონისგან მოითხოვდა, რომ ტოლკინის 3 წიგნისგან 1 ფილმი შეექმნა, წინააღმდეგ შემთხვევაში კი მის ჩანაცვლებას კვენტინ ტარანტინოთი გეგმავდა.

ჯექსონმა საბოლოოდ დაარწმუნა ვაინშტაინი, რომ ფილმის გადასაღებად დამატებით სხვა კომპანიაც მოეძებნათ, რისთვისაც ვაინშტაინმა რეჟისორს ძალიან ცოტა დრო — 1 კვირა მისცა. საბოლოოდ ჯექსონმა კომპანიამ New Line Cinema-სთან შეთანხმება და, ვაინშტაინის წინააღმდეგობის მიუხედავად, 3 ფილმის გადაღება შეძლო და მსოფლიო აღიარებაც მოიპოვა.

ილაიჯას თქმით, ამ დაპირისპირების შემდეგ ტრილოგიისთვის ერთ-ერთი ორკის ნიღაბი ჰარვი ვაინშტაინის სახის მიხედვით შეიქმნა.

ჰარვი ვაინშტაინი ჰოლივუდის გავლენიან პროდიუსერად მუშაობდა. მის წინააღმდეგ გამოძიება მას შემდეგ დაიწყო, რაც 2017 წლის ბოლო ის არაერთმა ქალმა სექსუალურ შევიწროებაში დაადანაშაულა, რამაც #MeToo მოძრაობას საფუძველი ჩაუყარა. 90-ზე მეტმა ქალმა ჰარვი ვაინშტაინი სექსუალურ შევიწროებაში, თავდასხმასა და გაუპატიურებაში დაადანაშაულა. საბოლოოდ, 2020 წლის მარტში ვაინშტაინს 23-წლიანი პატიმრობა მიესაჯა.

ივლისში ვაინშტაინი ნიუ-იორკის ციხიდან ლოს-ანჯელესში გადაიყვანეს, რადგან სასამართლოს მის წინააღმდეგ წარდგენილი სექსუალური ძალადობის კიდევ რამდენიმე საქმეზე განაჩენი უნდა გამოეტანა. ამჯერად ვაინშტაინის წინააღმდეგ სექსუალური ძალადობის 11 ბრალდება განიხილებოდა, რომლებიც ხუთ სხვადასხვა ქალს უკავშირდებოდა. მათ შორის იყო გაუპატიურების შემთხვევაც. ინციდენტები 2003-2013 წლების შუალედში ლოს-ანჯელესში მოხდა, ამიტომაც განიხილავდა აღნიშნულ შემთხვევებს ამ შტატის სასამართლო. 69 წლის ჰარვი ვაინშტაინი არცერთ ბრალდებას არ აღიარებს და აცხადებს, რომ სექსუალური სახის ყველა კავშირს ურთიერთშეთანხმებით ამყარებდა.

ვაინშტაინის წინააღმდეგ ბრალდებების განხილვა ამით არ დასრულებულა: კიდევ გრძელდება გამოძიება იმ 80-ზე მეტი ქალის მიერ გამოთქმული ბრალდებების ნაწილის შესახებ, რომლებიც მას წლების წინ, სხვადასხვა დროს ჩადენილ სექსუალურ ძალადობაში ადანაშაულებდნენ.