როდესაც პატარები იძინებენ, მშობლებისათვის განკუთვნილი, თავისუფლებისა და განტვირთვის რამდენიმე დაუვიწყარი საათი იწყება. მთელი ამ დროის მანძილზე არ გტოვებთ სიამოვნების განცდა და ფიქრობთ, რომ თქვენს შვილებს ტკბილად სძინავთ, დღის მანძილზე დახარჯული ენერგიის ანაზღაურებაში კი ხელს ვეღარავინ შეგიშლით.

თუმცა ასე დარწმუნებულიც ნუ იქნებით. ბავშვებს შეიძლება საკუთარი, ღამის ცხოვრება და გეგმები ჰქონდეთ. ნიუ-იორკში ტყუპი ძმები, ანდრე და რაიანი ცხოვრობენ, რომლებმაც სწორედ ამ გზით გააოცეს მშობლები და საზოგადოების ყურადღება მიიპყრეს.

ვინ იფიქრებდა, რომ ორი წლის ტყუპები ღამის ორ საათზე წვეულებას მოაწყობდნენ და საბნებისა და ბალიშების დახმარებით ოთახს გასართობ მოედნად გადააქცევდნენ?! პატარების სახალისო ხტომა-თამაში ოთახში დამონტაჟებულმა კამერამ დააფიქსირა. სოციალურ ქსელებში ვიდეოს დიდი გამოხმაურება მოჰყვა და პოპულარობაც დაიმსახურა.