ოკუპანტებმა გორის მუნიციპალიტეტის სოფელ ხურვალეთის მიმდებარედ ე.წ. გამაფრთხილებელი ბანერი აღმართეს. ბანერზე რუსულად აწერია: "ფრთხილად, სახიფათო მონაკვეთი". ინფორმაცია ამის შესახებ თავდაპირველად ანტისაოკუპაციო მოძრაობამ გაავრცელა, მოგვიანებით კი ფაქტი სახელმწიფო უსაფრთხოების სამსახურმა დაადასტურა. სუს-ში აცხადებენ, რომ ბანერი ოკუპირებული ტერიტორიის სიღრმეშია აღმართული.

"2008 წლიდან, რუსეთის საოკუპაციო ძალები ოკუპირებულ ტერიტორიებზე ახორციელებენ უკანონო აქტივობებს, მათ შორის, უკანონო ე.წ. ბორდერიზაციას, სამხედრო ინფრასტრუქტურის უკანონო მოწყობას და ა.შ.

სახელმწიფო უსაფრთხოების სამსახური აფიქსირებს საოკუპაციო ძალების მიერ განხორციელებულ დესტრუქციულ ქმედებებს, თითოეულ მათგანზე აქტიურდება ცხელი ხაზი და ინფორმაცია რეალურ დროში მიეწოდება საქართველოში ევროკავშირის სადამკვირვებლო მისიას. მსგავსი უკანონო აქტივობები ასევე განიხილება ჟენევის საერთაშორისო დისკუსიების ფარგლებში", — აღნიშნავენ უწყებაში.

მათივე თქმით, საოკუპაციო ძალების უკანონო აქტივობები აზიანებს ადგილზე არსებულ უსაფრთხოების გარემოს და ართულებს ადგილობრივი მოსახლეობის ყოველდღიურ ყოფას.

"აღნიშნულზე სრული პასუხისმგებლობა ეკისრება რუსეთის ფედერაციას", — აცხადებენ სუს-ში.