ე.წ. მოსმენების კანონთან დაკავშირებით, გიორგი მარგველაშვილის მიერ გამართულ კონსულტაციებს სხვადასხვა პოლიტიკურ პარტიებთან, ირაკლი კობახიძე ეხმაურება.

პარლამენტის თავჯდომარის თქმით, თუ ვეტოს უფლებას გამოიყენებს, მაშინ ცვლილებების პაკეტს კიდევ ერთხელ ეყრება კენჭი. ინფორმაციას რუსთავი 2 ავრცელებს.

"ჩვენ გვაქვს პოზიციები ჩამოყალიბებული ამ პაკეტთან დაკავშირებით და სწორედ ამის საფუძველზე მივიღეთ გადაწყვეტილება, როდესაც სამი მოსმენით მივიღეთ ფარული საგამოძიებო მოქმედებების შესახებ კანონპროექტების პაკეტი. აქედან გამომდინარე, ჩვენ რა თქმა უნდა, ამ პოზიციაზე ვრჩებით და ამის საფუძველზე კენჭი ეყრება კიდევ ერთხელ ვეტოს შემთხვევაში, მომდევნო კვირაში კანონპროექტების პაკეტს საქართველოს პარლამენტში" - განაცხადა კობახიძემ.

კანონპროექტთან დაკავშირებით გიორგი მარგველაშვილი გუშინ ევროპული საქართველოსა და ნაციონალური მოძრაობის წევრებს შეხვდა, ის დღეს პატრიოტთა ალიანსთან შეხვედრასაც გეგმავს. პრეზიდენტმა კონსულტაციებზე ქართული ოცნებაც მიიწვია, თუმცა უმრავლესობის წევრები მას არ გამოხმაურებიან.

გიორგი მარგველაშვილის კანონპროექტზე ვეტოს დადების უფლება 21 მარტამდე აქვს.