ქართული ოცნების დეპუტატის, მიხეილ სარჯველაძის განცხადებით, ძალადობრივი კონტრაქციის დასაწყისში პოლიციის საკმარისი რაოდენობა არ იყო მობილიზებული, რადგან ეს წინასწარ არ იყო პროგნოზირებადი.

"უკვე დასაწყისში არ იყო საკმარისი რაოდენობა ნამდვილად, ობიექტურად, არ იყო წინასწარ პროგნოზირებადი, ამას ვიძახი, მაგრამ მერე, როდესაც საჭიროება გამოჩნდა, დაუყოვნებლივ, ძალიან სწრაფად შეივსო", — განაცხადა მან პალიტრანიუსის ეთერში.

მისივე თქმით, ძალადობრივი კონტრაქციის ამგვარი განვითარება მოსალოდნელი არ იყო.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.