აშშ-ს პრეზიდენტის ოჯახში ძალიან სევდიანი დილა გათენდა. ქვეყნის პირველმა ლედიმ, ჯილ ბაიდენმა ტვიტერის დახმარებით საზოგადოებას აცნობა, რომ მათი 13 წლის გერმანული ნაგაზი ჩემპი დაიღუპა.

"ის ჩვენი მუდმივი თანამგზავრი იყო 13 წლის განმავლობაში, ჩვენს ოჯახში მას ყველა ეთაყვანებოდა", — წერს ჯილ ბაიდენი.

ჩემპი ბაიდენების ოჯახმა 2008 წელს აიყვანა, როდესაც ბარაკ ობამა აშშ-ს პრეზიდენტი გახდა. როგორც ცნობილია, მას სახელი ჯო ბაიდენის შვილიშვილმა შეურჩია. პრეზიდენტის განცხადებით, სახელი ჩემპი მას მამამის ახსენებს, რომელიც ეუბნებოდა: "წარუმატებლობის მიუხედავად, არასდროს დანებდე ჩემპიონო."

ფოტო: People magazine

ჩემპის სიკვდილის მიზეზი უცნობია, თუმცა გერმანული ნაგაზებისთვის სიცოცხლის საშუალო ხანგრძლივობა 9-დან 13-წლამდეა.

"მიუხედავად იმისა, რომ ბოლო პერიოდში ძალიან სუსტად იყო, ჩვენ დანახვაზე ენერგია ემატებოდა. ყოველთვის იქ უნდოდა ყოფნა, სადაც ჩვენ ვიყავით და ჩვენც ბევრად უკეთ ვგრძნობდით თავს მის გვერდით", — ჰყვება პირველი ლედი.

მას შემდეგ, რაც ჯო ბაიდენი ამერიკის პრეზიდენტი გახდა, ჩემპი მასთან ერთად გადავიდა თეთრ სახლში საცხოვრებლად. როგორც პრეზიდენტი და მისი ცოლი იხსენებენ, მას ძალიან უყვარდა დღის ბოლოს, წყვილთან ერთად ბუხრის წინ ჯდომა.