ბიძინა ივანიშვილი Bloomberg-ის მილიარდერთა სიაში დაბრუნდა. რეიტინგი მსოფლიოს 500 უმდიდრეს ადამიანს მოიცავს, რომელშიც გუშინდელი მდგომარეობით ივანიშვილი აღარ იძებნებოდა.

არსებული ინფორმაციით, ბიძინა ივანიშვილი Bloomberg-ის სიაში ბოლო, მე-500 ადგილზეა და მისი ქონება 5,92 მილიარდ დოლარად არის შეფასებული. ივანიშვილის რეიტინგიდან გასვლა და დაბრუნება სიის სხვა წევრების ქონების ცვლილებამ გამოიწვია.

Forbes-ის რეიტინგის მიხედვით კი, ივანიშვილი 4,8 მილიარდი დოლარის მფლობელია და უმდიდრესი ადამიანების ჩამონათვალში 589-ე ადგილს იკავებს. ამ გამოცემის ცნობით, ივანიშვილი 2020 წელსაც 4,8 მილიარდ დოლარს ფლობდა, ხოლო 2019 წელს მისი ქონება 100 მილიონით მეტი, 4,9 მილიარდი დოლარი იყო.

მიმდინარე წლის დასაწყისში ბიძინა ივანიშვილმა განაცხადა, რომ მის საკუთრებაში არსებული ყველა ის აქტივი, რომელიც საკრედიტო და სხვა სახის ვალდებულებებით არ არის დატვირთული, საქველმოქმედო ფონდ ქართუს გადაეცემოდა, ხოლო მისი და მისი ცოლის განკარგულებაში 200 მილიონი დოლარი რჩებოდა. ამის მიუხედავად, Bloomberg-ისა და Forbes-ის რეიტინგებში საქართველოს ყოფილი პრემიერმინისტრი კვლავ მილიარდერად არის მოხსენიებული.