ბორჯომის ქარხანასა და გაფიცულ თანამშრომლებს შორის შეთანხმება შედგა. როგორც ერთ-ერთი გაფიცული თანამშრომელი, ზურაბ ბუხრიკიძე ამბობს, მათი მოთხოვნები დაკმაყოფილდა.

"ჩვენი მოთხოვნები დაკმაყოფილდა, რაც შეთავაზება გვქონდა, ყველაფერი დაკმაყოფილდა აბსოლუტურად. ველაპარაკეთ დირექტორის მოვალეობის შემსრულებელს, ყველა დააკმაყოფილა, ყველა უბანი დააკმაყოფილა, მადლობა კომპანიასაც, მადლობა ჩვენც. ყველა უბანზე გათანაბრდა ხელფასები და მერე წამოვიდა 30%-იანი მატება. ეს ყველაფერი დაკონკრეტდა უკვე, ხელმეორედ გავივლით მოლაპარაკებას და შევხვდებით, ამით არ დამთავრებულა მარტო და ყველაფერს დავაკანონებთ საბუთებით", — ამბობს ბუხრიკიძე.

როგორც პროფკავშირების ახალგაზრდული მოძრაობა აცხადებს, დასაქმებულთა მოთხოვნების უმეტესი ნაწილი დაკმაყოფილდა, მთავარი მოთხოვნის შესაბამისად გაეზრდებათ თანამშრომლებს ხელფასები 1 ივნისიდან და სხვა შრომითი პირობებიც გაუმჯობესდება.

ასევე, მათი ინფორმაციით, პროტესტის ფონზე შეიცვალა ბორჯომის ადმინისტრაცია და დირექტორი.

ბორჯომის N1 და N2 ჩამომხსმელი ქარხნების თანამშრომლები 18 მაისს გაიფიცნენ. მათი ძირითადი მოთხოვნები ხელფასების ზრდა, დასვენებისა და შესვენების უფლების ქონა და კომპანიაში პროფკავშირული ნიშნით დისკრიმინაციის აკრძალვაა.

პროფკავშირების ახალგაზრდული მოძრაობა დასაქმებულთა დაყრდნობით აცხადებს, რომ მათი ხელფასები ერთი წლის განმავლობაში 200-250 ლარით იკლებდა. კადრების სიმცირის გამო შესვენებით ვერ სარგებლობენ და ზეგანაკვეთურ სამუშაოს მხოლოდ მცირე ნაწილს უხდიდნენ.

მათ გაფიცვას კომპანია IDS ბორჯომი პროფკავშირების ორგანიზებულ მიზანმიმართულ საბოტაჟის მცდელობას უწოდებს. მათივე თქმით, სამართლებრივ ჭრილში კონსტრუქციული დიალოგის თანამშრომლებთან გამართისთვის მზად არიან. IDS ბორჯომი ამტკიცებს, რომ მათი თანამშრომლების დიდ ნაწილს სამუშაო პროცესისთვის დაბრუნება სურს, თუმცა, მათივე თქმით, ქარხნების მუშაობის გაგრძელებას პროფკავშირების ლიდერებისა და სხვადასხვა აქტივისტის "უპასუხისმგებლო მოქმედებები აფერხებს".