ქართული ოცნების დეპუტატის, ნიკოლოზ სამხარაძის განცხადებით, ნაციონალური მოძრაობის ლიდერის, ნიკა მელიას ციხიდან გამოშვება მათთვისაც ძალიან მძიმე იყო და იცოდნენ, რომ არაპოპულარული ნაბიჯი იყო. ამის შესახებ მან რუსთავი 2-ის ეთერში ისაუბრა.

"არც ჩვენ და არც არავინ დედამიწის ზურგზე, მთელს მსოფლიოში არავინ არ მიიჩნევს რომ მელია არის პოლიტიკური პატიმარი. ყველამ ბრიუსელშიც ძალიან კარგად იცის, რის გამო არის ის საპყრობილეში. ყველამ იცის, როგორ მოისროლა მან სამაჯური გასულ წელს, ყველამ იცის, რომ ის მიდიოდა პროვოკაციაზე და ეს საქმე არის ყველასთვის ძალიან კარგად ცნობილი. მე მინდა ჩვენს საზოგადოებას ვუთხრა, რომ არავის ეჭვი არ ეპარება ამ შემთხვევაში, მელიას საქმესთან დაკავშირებით", — განაცხადა მან.

მისი თქმით, ქართულმა ოცნებამ მელიას შეწყალების გადაწყვეტილება ქვეყანაში არსებული მძიმე ეკონომიკურ-სოციალურიდ და პოლიტიკური ვითარების გამო მიიღო.

"ჩვენ დავთანხმდით იმ მოტივით, რომ ქვეყანაში დღეს არის ძალიან მძიმე სიტუაცია, რაც გამოწვეულია როგორც კოვიდით, ასევე, ეკონომიკური კრიზისით, რომელიც კოვიდს მოჰყვა, შესაბამისად, სოციალური მდგომარეობაც არის ძალიან რთული. რეგიონში მიმდინარეობს ძალიან შემაშფოთებელი მოვლენები, რომელიც უარყოფითად აისახება საქართველოს უსაფრთხოებაზე. აქედან გამომდინარე, გაჯიუტებული ოპოზიცია, რომელსაც არანაირი დასაბუთება და მტკიცებულება არ ჰქონდა იმისა, რომ არჩევნები გაყალბდა და ამის მიუხედავად არ შემოდიოდნენ პარლამენტში, სხვათაშორის, მე მინდა გითხრათ, რომ ევროკავშირში, ბრიუსელში არავის ეპარება ეჭვი, რომ არჩევნები ჩატარდა სამართლიანად და გამოხატული იყო ქართველი ხალხის ნება, ეს ბეჭედდასმული ამბავია ბრიუსელში", — განაცხადა მან.

მისივე თქმით, ქართულმა ოცნებამ არა მხოლოდ მელიაზე მიიღო რთული გადაწყვეტილება, არამედ დაუთმო ხუთი კომიტეტის თავმჯდომარეობა "3%-იან პარტიებს, რომეთაც ეს არ დაუმსახურებიათ".

"სწორედ ამიტომ მმართველმა ძალამ, ქართულმა ოცნებამ გადადგა ასეთი ნაბიჯი, რომელიც ჩვენთვისაც ძალიან მძიმე იყო და ვიცოდით, რომ არაპოპულარული ნაბიჯი იქნებოდა, თუმცა იმისათვის, რომ ქვეყანაში ეს ხელოვნური კრიზისი განიმუხტოს და ოპოზიცია შემოვიდეს პარლამენტში, ამისთვის ქართულმა ოცნებამ ძალიან ბევრი რამ დათმო. ჩვენ ძალიან ბევრს ვლაპარაკობთ მელიაზე და არ მგონია, ამდენი სალაპარაკო იყოს, თუმცა მნიშვნელოვანი საკითხებია იქ, მაგალითად, კომიტეტის თავმჯდომარეები, 5 კომიტეტის თავმჯდომარე, რომელიც ქართულმა ოცნებამ, როგორც გამარჯვებულმა ძალამ, უნდა დაუთმოს 3%-იან პარტიებს, რომელთაც ეს არ დაუმსახურებიათ", — განაცხადა მან.

ევროპული საბჭოს პრეზიდენტის, შარლ მიშელის ინიციატივით შექმნილი დოკუმენტის იმ ნაწილზე, სადაც 20 ივნისის საქმეზე ბრალდებულების ამნისტიაზეა საუბარი, განსხვავებული ინტერპრეტაციები ვრცელდება.

სტრატეგია აღმაშენებლის ლიდერმა, გიორგი ვაშაძემ განაცხადა, რომ ამნისტია არ შეეხებათ მათ, ვინც უკვე არაა მიცემული სისხლის სამართლებრივ პასუხისგებაში. რაც შეეხება სამართალდამცველებისთვის ამნისტირებას, ქართული ოცნების ლიდერები ამბობენ, რომ იგი სამართალდამცველებსაც უნდა შეეხოთ, ოპოზიცია ამას ეწინააღმდეგება. ამ ამბავს გამოეხმაურნენ თავად 20 ივნისს დაზარალებულები, რომელებიც ამბობენ, რომ პარტიებს არ აქვთ უფლება გადაწყვიტონ, შეწყდეს თუ არა საქმეების განხილვა.

სამართალდამცველები ამნისტირებას დაუშვებლად მიიჩნევენ საქართველოს ახალგაზრდა იურისტთა ასოციაცია და ადამიანის უფლებათა ცენტრი — ორგანიზაციები, რომლებიც 20 ივნისს დაზარებული მოქალაქეებისა და ჟურნალისტების ინტერესებს იცავენ როგორც საქართველოში, ისე ადამიანის უფლებათა ევროპულ სასამართლოში.

გაიგეთ მეტი: