ტოტენჰემ ჰოტსპურში გატარებული 17 თვის შემდეგ ჟოზე მოურინიომ გუნდის მთავარი მწვრთნელის თანამდებობა დატოვა. მასთან ერთად გაათავისუფლეს კიდევ ოთხი მწვრთნელი: ჟოაო საკრამენტო, ნუნო სანტოსი, კარლოს ლალინი და ჯოვანი კერა.

"ჟოზე და სხვა მწვრთნელები ჩვენ გვერდით იყვნენ კლუბის ყველაზე რთულ პერიოდში", — აღნიშნავს ტოტენჰემის თავჯდომარე, დენიელ ლევი, — "ჟოზე ნამდვილი პროფესიონალია, რომელმაც პანდემიის პერიოდში უდიდესი ძლიერება გამოიჩინა. პირადად მე მასთან მუშაობა მომწონდა და ვწუხვარ, რომ ყველაფერი ისე არ გამოვიდა, როგორც წარმოგვედგინა. მას აქ ყოველთვის გულთბილად დავხვდებით და მადლიერები ვიქნებით მისი და მისი სამწვრთნელო გუნდის გაწეული ძალისხმევისთვის

ფოტო: Getty Images

პორტუგალიელმა არგენტინელი მოურისიო პოჩეტინო 2019 წლის ნოემბერში ჩაანაცვლა და პრემიერ ლიგის გასულ სეზონში კლუბი მეექვსე პოზიციამდე დააწინაურა.

ლიგის გასულ სამ თამაშში მოპოვებული ორი ქულის შემდეგ ტოტენჰემი ამჟამად მეშვიდე პოზიციას იკავებს. ინგლისურმა კლუბმა მარტში ევროპა ლიგაც დატოვა. ზაგრების დინამოსთან დამარცხების შემდეგ მოურინიომ კლუბს "შემართება" დაუწუნა, კაპიტანმა ჰუგო ლორისმა კი გუნდის თამაშს "სირცხვილი" უწოდა.

"ჩემს გუნდს საერთოდ არ ეტყობოდა, რომ მნიშვნელოვან თამაშს თამაშობდა", — აღნიშნა მოურინიომ მატჩის შემდეგ, — "თუ რომელიმე მათგანისთვის ეს მნიშვნელოვანი თამაში არ არის, ჩემთვის არის. ჩემი საქმისა და კარიერისადმი პატივისცემის გამო, ყოველი თამაში მნიშვნელოვანია. მჯერა, ტოტენჰემის ყველა ფანისათვისაც ასეა. სხვა შემართებაა საჭირო. დამწუხრებული არ ჰქვია იმას, რასაც ახლა ვგრძნობ, რადგან ეს სევდაზე მეტია".

თავის სამწვრთნელო კარიერაში პირველად, მოურინიოს გუნდი 10-ჯერ დამარცხდა ერთ სეზონში. ამასთან, ამ სეზონზე პრემიერ ლიგის არცერთ სხვა გუნდს იმაზე მეტი ქულა არ დაუკარგავს პოზიციებში, რამდენიც ტოტენჰემმა დაკარგა.

მოურინიოს თანამდებობაზე ყოფნისას, კლუბმა ბოლო მატჩი ევერტონთან გამართა, რომელიც ფრედ დამთავრდა.

მომდევნო თამაშს, ინგლისის ლიგის თასის ფარგლებში, კლუბი 25 აპრილს ჩაატარებს და მანჩესტერ სიტის შეხვდება.

18 აპრილს ასევე ცნობილი გახდა, რომ ტოტენჰემი პრემიერ ლიგის იმ ექვს კლუბს შორისაა, რომლებიც ევროპულ სუპერ ლიგას შეუერთდებიან.