საქართველოს პრეზიდენტმა, სალომე ზურაბიშვილმა პარლამენტის ტრიბუნიდან განაცხადა, რომ ხელისუფლებასა და ოპოზიციას შორის შეთანხმების მისაღწევად კომპრომისის გზაზე გამბედაობა და ვაჟკაცობა არცერთ მხარეს არ ეყო.

"ვწუხვარ, რომ აქამდე ვერ შევძელით და ვერ მივაღწიეთ შეთანხმებას. ორივე მხარე დათმობაზე უნდა წასულიყო, როგორც ევროკავშირის წარმომადგენელი გვკარნახობდა. სამწუხაროდ, არცერთ მხარეს არ ეყო კომპრომისის გზაზე გამბედაობა და შეიძლება ითქვას ვაჟკაცობა. ხელისუფლებას არ ეყო გამბედაობა იმისთვის, რომ ქვეყნის სტაბილურობა და დემოკრატიული პროცესი, ევროპის აქტიური მოკავშირეობა უფრო მაღლა დაეყენებინა, ვიდრე ცალკეული დეტალები და იმედი მაქვს, რომ ეს მოხდება. ოპოზიციას კი იმისათვის, რომ განთავისუფლებულიყო შანტაჟისა და წნეხისაგან, საკუთარი ამომრჩევლისთვის პატივი ეცა და ერჩია პოლიტიკურად ერთადერთი მისაღები გზა მრავალპარტიულ პარლამენტში დაბრუნებისა... ორივე მხარე ალბათ ფიქრობს, რომ გამარჯვებული გამოვიდა ამ პროცესიდან. იმით იმხნევებს თავს, რომ რაღაც პრინციპები, თუმცა ორი კატეგორიის პრინციპი არსებობს, ის, რომელიც საკუთარი ქმედებების გამართლებას ემსახურება და ის, რომელიც გამოგვიჩენს ჭეშმარიტ გზას", — განაცხადა ზურაბიშვილმა.

ზურაბიშვილის თქმით, ასეთი პრაგმატული და დაბალანსებული კომპრომისის საშუალებას იძლეოდა და კვლავ იძლევა ევროპული საბჭოს პრეზიდენტის, შარლ მიშელის პირადი წარმომადგენლის, კრისტიან დანეილსონის მიერ შეთავაზებული ტექსტი, რომელსაც ის სრულად უჭერს მხარს.

პარლამენტის რიგგარეშე სხდომაზე მან მხარეებს შეთანხმებისკენ მოუწოდა.