შესაძლოა, ფიქრობთ, რომ ყველასთვის კარგად ნაცნობი ბეჭდების მბრძანებლის ტრილოგიის ეკრანიზაცია იმდენად სრულყოფილია, სხვა ვის უნდა გაებედა კიდევ ფილმების გადაღებაო, მაგრამ თურმე, პიტერ ჯექსონს ამ ფენტეზის სამყაროს ეკრანებზე გაცოცხლება საბჭოთა კავშირში ათი წლით დაასწრეს.

27 მარტს YouTube-ზე გამოჩნდა 1991 წელს იმდროინდელი ლენინგრადის ტელევიზიისთვის ჯ.რ.რ. ტოლკინის საკულტო ნაწარმოების ბეჭდის საძმოს მიხედვით გადაღებული ფილმი მცველები: ფილმის პირველი ნაწილის ხილვა ქვემოთ მოცემულ ვიდეოში შეგიძლიათ, მეორე კი ამ ბმულზეა.

The Guardian-ის ინფორმაციით, აღნიშნული სატელევიზიო ეკრანიზაციის ჩანაწერი პრემიერის შემდეგ არქივებში ჩაიკარგა და მხოლოდ ახლა, 30 წლის შემდეგ ტოლკინის შემოქმედების ფანების დაუღალავი მონდომებით ხელახლა აღმოაჩინეს, გააციფრულეს და ინტერნეტპლატფორმაზე უფასოდ გაავრცელეს.

როგორც ცნობილია, ეს ბეჭდების მბრძანებლის ერთადერთი ეკრანიზაციაა, რომელიც საბჭოთა კავშირში გადაღებულა. სავარაუდოდ, ამ პროექტმა უფრო მეტი ყურადღება დღეს მიიქცია, ვიდრე თავის დროზე: YouTube-ზე გამოქვეყნებულ ვიდეოს უკვე მილიონზე მეტი ნახვა აქვს.

აღნიშნული ეკრანიზაციის კომპოზიტორი ცნობილი როკბენდის Akvarium წევრი, ადრე რომანოვი იყო: ფილმის შესავალ სიმღერაში რომანოვი ტოლკინის აღწერას, თუ როგორ შეიქმნა შუამიწეთი, რუსული თარგმანით ასრულებს.

აღსანიშნავია, რომ საბჭოთა კავშირში ტოლკინის კიდევ ერთი ცნობილი ნაწარმოების — ჰობიტის ეკრანიზაცია შექმნეს, ოღონდ ამჯერად ანიმაციურ ჟანრში, რომლიდანაც ნაწყვეტები ქვემოთ მოცემულ ვიდეოში შეგიძლიათ იხილოთ: