ქართული ოცნების ერთ-ერთი წევრის, ნიკა სამხარაძის განცხადებით, მმართველი პარტიის დეპუტატის, გია ვოლსკის მიერ აქტივისტებისადმი მიმართული უხამსი ჟესტი "კარგი საქციელი" არ იყო, თუმცა რაღაც მომენტში შეიძლება ადამიანს "ნერვებმა უმტყუნოს", როცა მას შეურაცხყოფას აყენებენ.

"შემიძლია ვთქვა, რომ ნებისმიერ პოლიტიკოსს და საჯარო პირს აქვს თმენის ვალდებულება და შესაბამისად, რა თქმა უნდა, ეს კარგი საქციელი არ არის. იცით რა, ძალიან რთულია იმ ეპიზოდში, თან, როგორც აქ ჩემს წინ გამომსვლელმა თქვა, თურმე აგინებდნენ მას. თქვენ ამბობთ, მონა უწოდეს, ვიღაც ამბობს აგინებდა, ადამიანს შეიძლება რაღაც მომენტში ნერვებმა, ნებისმიერ ადამიანს, ნებისმიერ მომენტში, თუ მას შეურაცხყოფას აყენებენ უხამსი ფორმით, შეიძლება ნერვებმა უმტყუნოს", — თქვა მან.

დღეს, 2 აპრილს ქართული ოცნების დეპუტატმა, გია ვოლსკიმ აქტივისტებს უხამსი შინაარსის გამომხატველი ჟესტი უჩვენა. ვოლსკი მმართველ პარტიაში ჩანიშნულ უმრავლესობის სხდომაზე მივიდა, რა დროსაც აქტივისტები მას შეძახილით — "მონა" დახვდნენ. სწორედ ამის შემდეგ გააკეთა უხამსი ჟესტი აქციის მონაწილეების მიმართულებით ქართული ოცნების ერთ-ერთმა ლიდერმა.