ქართული ოცნების თავმჯდომარის, ირაკლი კობახიძის განცხადებით, 30 მარტის მოლაპარაკებებზე ოპოზიციის შიგნით იყო ორი მხარე, ნაწილი იყო დესტრუქციული, ცოლო დანარჩენთან არის მოლაპარაკების რესურსი.

"იქ იყო ორი მხარე, ოპოზიციის შიგნით, ერთი ნაწილი, ნახევარი იყო დესტრუქციული და ხისტი, არაკონსტრუქციული თავიდან ბოლომდე მოლაპარაკებებში. ეს იყო 4 პარტია, 4 რადიკალური ოპოზიციური პარტია, ეს არის ნაციონალური მოძრაობა, ევროპული საქართველო, გირჩი ე.წ. მეტი თავისუფლება და ლელო. 4 იყო მკვეთრად გამოხატული რადიკალური პოლიტიკური ძალა, დანარჩენთან არის მოლაპარაკების რესურსი", — განაცხადა კობახიძემ.

გუშინ, 30 მარტს ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს