ქართული ოცნების თავმჯდომარის, ირაკლი კობახიძის განცხადებით, იმის მიუხედავად, მიაღწევენ თუ არა შეთანხმებას, პუნქტებს გაასაჯაროვებენ. ამის შესახებ მან პარტიში გამართული პოლიტსაბჭოს სხდომის შემდეგ, ერვოკავშირის წარმომადგენლობის ოფისში ისაუბრა.

"ამის პირობა დღესვე, ახლავე შემიძლია დავდო საზოგადოების წინაშე, რომ იმისდა მიუხედავად, დაიდება თუ არ დაიდება შეთანხმება, ჩვენ პუნქტებს გავასაჯაროებთ და რასთან დაკავშირებით რა პოზიცია გვქონდა, თავისი არგუმანტებით და ყველაფრით იქნება გასაჯაროებული", — თქვა კობახიძემ.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს დღეს, 29 მარტს ხვდება.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.