უკვე ერთი წელი გავიდა, რაც COVID-19-ის მიერ შეცვლილ რეალობაში ვცხოვრობთ. დიახ, ავადსახსენებელი 2020 წლის მარტიდან ისე გავიდა თორმეტი თვე, რომ თავადაც ვერ გავაცნობიერეთ.

მეტიც — ყველაფერი, რაც ამ დროის განმავლობაში მოხდა, ცუდ სიზმარს ჰგავს, რომელიც შეგრძნებების დონეზე კარგად გახსოვს, მაგრამ თან ძალიან შორეულად გეჩვენება.

ახლა უკვე სულ სხვა თვალით ვუყურებთ მომავალს: არაერთი სანდო ვაქცინა შეიქმნა და პანდემიის დასასრულსაც გაცილებით ოპტიმისტურად შევცქერით. თუმცა, რა ხდებოდა ერთი წლის წინ, როცა ჩვენს ყოველდღიურობაში პირველად გამოჩნდა კორონავირუსი? რისი გვეშინოდა? რისი იმედი გვქონდა?

პანდემიის საწყის ეტაპზე აქტუალურ, თუმცა დღეს უკვე კომიკურ მოგონებებად ქცეულ მოვლენებს გადავავლოთ თვალი:

1. ქართველებს არაფერი გვემუქრებოდა

ჯერ რჩეული ერი ვიყავით, შემდეგ ღვთისმშობლის კალთა გვიცავდა, ბოლოს ე.წ. "სამი მუშკეტერის" ეპიდსიტუაციის მართვის უნარებს ვაქებდით, მაგრამ მოვიდა შემოდგომა და...

2. ტუალეტის ქაღალდი ყველაზე მნიშვნელოვანი რამ იყო, რაც პანდემიისას უნდა მოგემარაგებინა

სულ ცოტაც და ტუალეტის ქაღალდის შეკვრა ფულის კუპიურას ჩაანაცვლებდა.

3. კარანტინში ჯანსაღად კვებას დავიწყებდით

კი, კი, მომატებული კილოგრამები მოხარშული ბროკოლისა და უცხიმო წვნიანების დიეტის დამსახურებაა.

4. ახალ უნარებს შევიძენდით და ცოდნას გავიმრავალფეროვნებდით

ახალი უცხო ენა? რა პრობლემაა. კომპიუტერული პროგრამები? რა სალაპარაკოა. კემბრიჯის უნივერსიტეტის უფასო კურსები? ყველაფერს დავძლევ, თავისუფალი დროის მეტი რა მაქვს. ამ დროს როგორია ჩვენი შედეგი ერთი წლის თავზე? თქმადაც არ ღირს, ყველა მარტივად გამოიცნობს.

5. სახლში დაგროვილ წაუკითხავ წიგნებს გადავაბულბულებდით

წიგნის თაროებს მტვერი მაინც თუ გადავწმინდეთ, ეგ ვიკითხოთ.

6. ნებისმიერი პროდუქტი საგულდაგულოდ უნდა გაგვერეცხა

კი, იყო დრო, პურს ფეირით ვრეცხავდით.

7. ვირუსს ქუჩების მორეცხვით ვებრძოდით

კარანტინის გამო დაცარიელებულ ქუჩებში ღამით ჩავლილი მანქანები, რომლებიც ქალაქის ქუჩების დეზინფექციას ატარებდნენ, განსაკუთრებით უცნაური სანახაობა იყო.

8. სახლიდან მუშაობა შეუძლებელი იქნებოდა

მთელი რიგი სირთულეების მიუხედავად, ბევრი დადებითი დისტანციურ შრომაშიც აღმოვაჩინეთ, ოღონდ ეს მათ, ვისაც სამუშაოს გაგრძელების შესაძლებლობა სახლში მიეცა და თანაც სხვა გარემო-პირობებიც უწყობდა ხელს, თორემ ბევრი ადამიანი საერთოდ უმუშევარი დარჩა, ნაწილმა კი "ბრძოლის წინა ხაზზე" (ექთნები, მედდები, სუპერმარკეტების კონსულტანტები) ძველებურად გააგრძელა მუშაობა.

9. ყველაფერი მალე დასრულდებოდა

აი, დათბება და გაწყდება ვირუსი!

10. სამყარო უკეთესობისკენ შეიცვლებოდა

მგელი და ცხვარი ერთად მოძოვს ბალახს!