7 მარტს ოპრა უინფრის მიერ პრინც ჰარისთან და მეგან მარკლთან ჩაწერილი ინტერვიუ ამერიკულ ტელეარხზე გადაიცა. მიუხედავად იმისა, რომ ინტერვიუში გაკეთებული სავარაუდო აქცენტების გამო, მას დიდი ინტერესით ელოდებოდნენ მთელ მსოფლიოში, 2-საათიანი გადაცემის შინაარსი და სასექსის ჰერცოგისა და ჰერცოგინიას აღიარებები ბევრისთვის მაინც შოკისმომგვრელი აღმოჩნდა.

ასევე იხილეთ:

როგორც მოსალოდნელი იყო, ინტერვიუს დიდი გამოხმაურება მოჰყვა ინტერნეტსივრცეში. ბრიტანელმა ისტორიკოსმა და სამეფო ოჯახის მკვლევარმა, კეიტ უილიამსმა, აღნიშნა, რომ გადაცემაში მეგან მარკლის მიერ მოყოლილი ისტორიებით მის და პრინცესა დაიანას გამოცდილებას შორის არსებული განმაცვიფრებელი მსგავსებები გამოიკვეთა.

იმავე საკითხზე ინტერვიუში ყურადღება ჰარიმაც გაამახვილა და აღნიშნა, რომ ისტორიის განმეორება არ სურს. მისი თქმით, ვერც კი წარმოიდგენს, რისი გადატანა მოუხდა დედამისს.

"დაიანაც ცუდ დღეში აღმოჩნდა პრესის ხელში", — ამბობს უილიამსი, — "მასაც აკრიტიკებდნენ და თავს ესხმოდნენ, გაშორებამდე და გაშორების შემდეგაც. იგი საუბრობდა, როგორ სურდა, ხმამაღლა ესაუბრა, გადაწყვეტილებები თავად მიეღო და მისი ხმა გაეგონათ.

"დაიანა სამეფო ოჯახში გადატანილ ტანჯვაზეც საუბრობდა, იმის მსგავსზე, რაც ახლა მეგანისგან მოვისმინეთ. სამეფო ოჯახის წნეხის გამო, ისიც ფიქრობდა თვითდაზიანებასა და სუიციდზე. ახლა კი ვიგებთ, რომ მეგანსაც მსგავსი აზრები აწუხებდა".

წყვილმა ინტერვიუში აღნიშნა, რომ სამეფო ინსტიტუტმა მათ დაცვის გამოყოფა შეუწყვიტა. ტიტულის არმიღების გამო, მსგავსი ბედი ეწევა ჰარის და მეგანის შვილს, არჩისაც. ინტერვიუში ერთ-ერთი ყველაზე მკაფიოდ გაკეთებული აქცენტი სწორედ დაცვას ეხებოდა, რადგან, მეგანის თქმით, მან სამეფო ოჯახს თხოვნით მისწერა, რომ მისი ქმრის უსაფრთხოება უზრუნველეყოთ.

"როცა დაიანა დაიღუპა, ჰარი, რა თქმა უნდა, ძალიან პატარა იყო და იცოდა, რომ ჩარლზთან გაშორების შემდეგ დედამისს დაცვა არ ჰყავდა, რამაც, ვფიქრობ, უფრო დაამძიმა მშობლის ტრაგიკული სიკვდილი", — დასძენს უილიამსი.