საერთაშორისო გამჭვირვალობა-საქართველოში (TI) ტელეკომპანია ფორმულას ჟურნალისტ ვახო სანაიაზე თავდასხმის ფაქტს კატეგორიულად გმობენ. TI ხელისუფლებას მოუწოდებს აღნიშნული საქმე ეფექტურად გამოიძიოს და პასუხისმგებელი პირები კანონის სრული სიმკაცრით დასაჯოს.

ვახო სანაიას განცხადებით, უცნობი პირები თავს დაესხნენ და ფიზიკურად მას და მის ნათესავს გაუსწორდნენ.

"პირდაპირ აგრესია ჰქონდათ ჩემ მიმართ, როგორც მედიის წარმომადგენლის მიმართ", — ამბობს სანაია. ინციდენტის დროს ჟურნალისტს თან ახლდა მეუღლე და მცირეწლოვანი ბავშვი.

ორგანიზაციაში აცხადებენ, რომ აღნიშნული ფაქტი არის ხელისუფლების იმ აგრესიული და სიძულვილით სავსე რიტორიკის გამოძახილი, რომელიც მიმართულია კრიტიკული მედიის, ჟურნალისტებისა თუ განსხვავებული აზრის მქონე ადამიანების მიმართ.

"შედეგად, წახალისება ხდება მსგავსი სახის ძალადობისა, რაც საფრთხის ქვეშ აყენებს სიტყვისა და გამოხატვის თავისუფლებას. ხელისუფლებას აკისრია ვალდებულება უზრუნველყოს ჟურნალისტების საქმიანობისათვის უსაფრთხო გარემოს შექმნა, რაც პირველ რიგში კრიტიკული აზრის გამოხატვასა და თავისუფლად გავრცელებას გულისხმობს. მოვუწოდებთ მმართველი პარტიის წარმომადგენლებს, გაიაზრონ მათი როლი ამ პროცესში, შეწყვიტონ აგრესიული რიტორიკა კრიტიკული მედიის მიმართ, საჯაროდ დაგმონ ჟურნალისტების წინააღმდეგ მიმართული ნებისმიერი ფორმის ძალადობა და მედიის საქმიანობისთვის უსაფრთხო გარემოს შექმნა უზრუნველჰყონ", — წერია TI-ს განცხადებაში.

ჟურნალისტ ვახო სანაიას 25 თებერვალს თავს დაესხნენ. შინაგან საქმეთა სამინისტრომ მომხდარზე სამი პირი უკვე დააკავა და საქმე სისხლის სამართლის კოდექსის 126-ე მუხლის პირველი პრიმა ნაწილის "ბ" და "გ" ქვეპუნქტებით აღძრა, რაც ორი ან მეტი პირის მიმართ ჯგუფურად ჩადენილ ძალადობას გულისხმობს.