სახალხო დამცველის, ნინო ლომჯარიას განცხადებით, იგი ყველას დამცველია, მათ შორის, ნაციონალური მოძრაობისა და იმ ადამიანებისა, რომელთა დაცვაც "ხელისუფლებას ასე ძალიან არ უნდა". ასე ეხმაურება ის ქართული ოცნების კრიტიკას ენმ-ს თავმჯდომარის, ნიკა მელიას დაპატიმრების შესახებ მის მიერ გაკეთებული განცხადების გამო.

"მე ვარ, მათ შორის, ნაციონალური მოძრაობის დამცველი. იმიტომ, რომ სახალხო დამცველი, უპირველეს ყოვლისა, უნდა იცავდეს იმ ადამიანებს, ვისაც ყველაზე მეტად სჭირდება დაცვა. მე ვფიქრობ, რომ დღეს ოპოზიციას, განსაკუთრებით, ნაციონალურ მოძრაობას სჭირდება დაცვა. რა თქმა უნდა, მე ვადასტურებ, მეამაყება ის, რომ ვარ ყველა ადამიანის დამცველი, მათ შორის, იმ ადამიანებისა, რომელთა დაცვაც ხელისუფლებას ასე ძალიან არ უნდა და რის გამოც, ასე ებრძვიან სახალხო დამცველსაც", — ამბობს ლომჯარია.

ომბუდსმენმა ნიკა მელიას დაპატიმრების შესახებ დღეს განცხადება გაავრცელა. მან თქვა, რომ გასაბჭოებიდან 100 წლის თავზე არაფერი იმაზე სამარცხვინო არ შეიძლებოდა მომხდარიყო, როგორც ოპოზიციური პარტიის ოფისის დარბევა. სახლახო დამცველი გააკრიტიკა ქართულმა ოცნებამ. მმართველი გუნდის დეპუტატმა, გია ვოლსკიმ ნინო ლომჯარია "ნაცდამცველად" მოიხსენია და თქვა, რომ "ჯობია, ლომჯარიამ ამ ემოციურ შეძახილებს თავი დაანებოს".

დღეს, 23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, დღეს 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.