ლოს-ანჯელესის პოლიციამ 6 ადამიანი დააკავა, მას შემდეგ, რაც მათ ჰოლივუდის ცნობილი ნიშანზე W და D ასოები B-ებით გადაფარეს და სიტყვა Hollyboob-ით შეცვალეს. ინფორმაციას NBC ავრცელებს.

ლოს-ანჯელესის ღირსშესანიშნაობის გადაკეთების მცდელობას სამართალდამცავებმა ვანდალიზმი უწოდეს, თუმცა "დამნაშავეებმა" განაცხადეს, რომ მათ ძუძუს კიბოზე ცნობიერების ამაღლება სურდათ. ჩვენების მიცემის შემდეგ ისინი გაათავისუფლეს.

დაკავებულებიდან ერთ-ერთი ინსტაგრამის ინფლუენსერი ჯულია როუზია, რომელიც აცხადებს, რომ მისი მიზანი ქალის მკერდზე ინსტაგრამის ცენზურის გაპროტესტებაც იყო.

ის ამბობს, რომ წარსულში ინსტაგრამმა პერსონალური და ბიზნესანგარიში გაუუქმა, რომლებზეც ჯამში 6 მილიონი გამომწერი ჰყავდა. ჯულია დასძენს, რომ პლატფორმა, კომპანია ფეისბუქთან ერთად, ინფლუენსერებს აგრესიული პოლიტიკით ებრძვის და მსგავსი დამოკიდებულება ისეთ დამკვიდრებულ ბრენდებთან არ აქვს, როგორიც მაგალითად ფლეიბოია.

ფეისბუქმა შერჩევით დამოკიდებულებაზე ბრალდება უარყო და განაცხადა, რომ როუზის ანგარიშები წესების გამუდმებული დარღვევის გამო წაშალა.

საბოლოო შედეგით როუზი კმაყოფილია. "ეს ყველაფერი ერთად ძალიან დიდებულია", — ამბობს ის და ტვიტერზე დაპატიმრების კადრებს სიამაყით ავრცელებს.

ჰოლივუდის ცნობილი ნიშანი 1923 წელს შეიქმნა და მალევე იქცა როგორც გლამურის სიმბოლოდ, ისე ტურისტებისთვის მიმზიდველ ადგილად. ამ ეტაპზე სახელში ყველაზე მაღალი ასოა W და თითქმის 14 მეტრს აღწევს. 1987 წელს, რომის პაპის ვიზიტის გამო, ნიშანი დროებით შეცვალეს Holywood-ით, ხოლოდ 2017 წელს ხელოვანმა ის ასევე დროებით გარდაქმნა Hollyweed-ად.

ფოტო: franckreporter / iStock.com