ბოლო დროს სოციალურ მედიაში აუცილებლად გადააწყდებოდით საუბრებს ახალი სერიალის Bridgerton (ბრიჯერტონები) შესახებ და ალბათ, არც ის გაგიკვირდებათ, თუ გეტყვით, რომ ამ შოუმ ნეტფლიქსის რეკორდი მოხსნა და ამავე პლატფორმის ყველაზე პოპულარული სერიალის სტატუსი მოიპოვა.

ცოტა ხნის წინ გამოქვეყნებული სტატისტიკის მიხედვით, ბრიჯერტონები პრემიერიდან პირველი ოთხი კვირის განმავლობაში ნეტფლიქსის 82 მილიონზე მეტმა მაყურებელმა ნახა. ამ სტრიმინგ სერვისს ამჟამად 200 მილიონი მომხმარებელი ჰყავს, რაც იმას ნიშნავს, რომ ამ შოუს 41%-მა უყურა.

წინა რეკორდი 2019 წელს გამოსულ The Witcher-ს (მხედვარი) ეკუთვნოდა, რომელმაც პირველ 28 დღეში 76 მილიონი ნახვა დააგროვა. ეს შედეგი ბრიჯერტონებმა ექვსი მილიონით გააუმჯობესეს.

თუმცა, როგორც Deadline წერს, უნდა გავითვალისწინოთ ისიც, რომ როცა ჰენრი კავილის შოუმ თავისი რეკორდი მოხსნა, მაშინ ნეტფლიქსის მომხმარებლების რაოდენობა 167 მილიონს შეადგენდა და მხედვარის მაჩვენებელი საერთო მაყურებლების 46 პროცენტს უდრიდა.

აღსანიშნავია ისიც, თუ როგორ ითვლის ნეტფლიქსი სტატისტიკას: თუნდაც ერთი ეპიზოდის ორი წუთის ყურება საკმარისია, რომ მთელი სერიალის ერთ ნახვად ჩაითვალოს. შესაბამისად, ამ მონაცემებით 82 მილიონი მაყურებელი სულაც არ გულისხმობს იმას, რომ უკლებლივ ყველამ სერიალის პირველი სეზონი სრულად ნახა.

ასევე იხილეთ: