სასტუმროებისა და რესტორნების ფედერაციის დამფუძნებლის, შალვა ალავერდაშვილის განცხადებით, ტურიზმის სექტორში აბსოლუტური გაურკვევლობაა, ვინაიდან სასტუმროს წარმომადგენლებს სჭირდებათ პასუხი უნდა მიიღონ თუ არა ჯავშნები 1 თებერვლიდან.

"ჩვენ ველოდებოდით და ახლაც ველოდებით იანვრის ბოლოდან, თებერვლიდან მაღალმთიან კურორტებზე სასტუმროების გახსნას. ეს არის რეალობა, რასაც დღესაც ველოდებით და ჩვენ ჯავშნებს ვიღებთ თებერვალში ახლაც გუდაურსა და ბაკურიანში. ეს არის ის მინიმალური შემოსავალი შიდა ტურიზმისთვის, რაც მინიმალურად მხოლოდ საშუალებას მისცემს კომუნალურების გადახდის ადგილზე სასტუმროებს", — აცხადებს ალავერდაშვილი.

მისი თქმით, ტურისტების მხრიდან მოთხოვნა დიდია, თუმცა რეგულაციები ამაში ხელს უშლიან.

"სექტორში ხდება აბსოლუტური გაურკვევლობა, გუშინწინდელი გამოსვლის შემდეგ მივხვდით, რომ ჩვენი სექტორი საერთოდ აღარ ვარსებობთ. მგონი, საქმის კურსში აღარ არის არავინ, რომ სექტორი არსებობდა ოდესმე. რადგან ტურიზმის სექტორი მოკვდა, არ ნიშნავს, რომ ტურიზმის სექტორი აღარ იქნება. მთავარი, რაც უნდა გავაკეთოთ, უნდა ვიმუშავოთ, რომ ტურიზმის სექტორი აღვადგინოთ და არა გადავარჩინოთ, ტურიზმის სექტორი უკვე დიდი ხანია მკვდარია", — ამბობს ფედერაციის დამფუძნებელი.

ალავერდაშვილის თქმით, კოვიდინფექციასთან ერთად ცხოვრება ვისწავლოთ და ეკონომიკა აღვადგინოთ.