რუსთავი 2-ის ინფორმაციით, უკრაინაში დაკავებული გია ცერცვაძის ადვოკატი ლუკიანოვსკის იზოლატორიდან წერილს აქვეყნებს, რომელიც მათივე ცნობით, ცერცვაძეს ეკუთვნის:

"დიდი მადლობა ყველა იმ ადამიანს, ვინც მხარს მიჭერს. იმედი მაქვს, რომ უკრაინა არ გადასცემს ჩემს თავს ჩვენს საერთო მტერს და მე მექნება საშუალება, ვებრძოლო ჩვენს მტერს".

ფოტო: რუსთავი 2

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში, ინტერპოლის მოთხოვნით დააპატიმრეს.

ცერცვაძის დაცვის მოთხოვნით ნაციონალურმა მოძრაობამ დღეს, 24 იანვარს საპროტესტო აქცია შინაგან საქმეთა სამინისტროსთან გამართა.