Google Cultural Institute საძიებო გიგანტის ინიციატივაა, რომელიც მიზნად მსოფლიოს კულტურული მემკვიდრეობის გაციფრულებას ისახავს. სურათები შეიძლება დაიწვას, ძეგლები განადგურდეს და ხელნაწერები დაიკარგოს, მაგრამ მაღალი ხარისხის ციფრული ასლები (შედარებით) უსაფრთხო და სამუდამოა.

ამ მისიაზე ორგანიზაცია უკვე 5 წელია მუშაობს. მსოფლიოს სხვადასხვა მუზეუმებთან თანამშრომლობით, მათ ამ პერიოდში 200-მდე სურათი გააციფრულეს, რომელიც ვებსაიტზე ყველასთვის უფასოდაა ხელმისაწვდომი.

ახალი კამერა სახელად Art Camera ტექნოლოგიურმა კომპანიამ სპეციალურად ამ პროექტისთვის შექმნა. მისი დახმარებით, გაციფრულების პროცესი შეუდარებლად მარტივდება. თუ აქამდე ერთი სურათის გადასაღებად თითქმის მთელი დღე იყო საჭირო, ახალი კამერით ეს პროცესი ნახევარ საათამდე მცირდება.

კამერას აყენებენ გადასაღები ნახატის წინ, მის მეხსიერებაში აფიქსირებენ სურათის კუთხეებს და ამის შემდეგ Art Camera თავად იწყებს გადაღებას — ამოძრავებს ობიექტივს, აახლოვებს სურათის ყველა მონაკვეთს და გადაღებულ მასალას გუგლის სერვერებზე აგზავნის, ერთ-გიგაპიქსელიანი ფოტოს ასაწყობად.

ახალი კამერით უკვე 1000-ზე მეტი შედევრია გაციფრულებული

თუ უკანასკნელი 5 წლის მანძილზე, ძველი მეთოდით, ორგანიზაციამ 200 ნამუშევრის გაციფრულება შეძლო, ახალი კამერით უკვე 1000-ზე მეტი შედევრია დამატებული. ამ კოლექციის ნახვა აქ შეგიძლიათ.

მსგავსი წვდომა ხელოვნების ნიმუშებზე, კაცობრიობის ისტორიაში უპრეცედენტოა. ეს რესურსი შეუცვლელია ხელოვნების სტუდენტებისათვის, მკვლევარებისთვის ან უბრალოდ მოყვარულებისთვის, რადგან პოპულარულ ნახატებზე ასეთი ფორმით, დეტალიზაციით და შეუზღუდავი დროით დაკვირვება, დიდ მუზეუმებში, უმრავლესობისთვის შეუძლებელია.

რამდენიმე კვირის წინ გავრცელებული ინფორმაციით, გუგლის ციფრულ კოლექციას მალე ქართული კულტურული საგანძურიც შეემატება. ლადო გუდიაშვილის, ელენე ახვლედიანის და სერგო ქობულაძის ნახატები, ასევე კინოსა და თეატრის კოსტიუმები, არქეოლოგიური და სხვა მასალები, Google Cultural Institute-ის ვებსაიტზე უახლოეს მომავალში აიტვირთება.