ნაციონალური მოძრაობა არის უპირობო, ნამდვილი პოლიტიკური პარტია პოსტ-საბჭოთა სივრცეში - ამ სიტყვებით მიმართა საქართველოს ყოფილმა პრეზიდენტმა და პარტიის ერთ-ერთმა დამფუძნებელმა მიხეილ სააკაშვილმა დელეგატებს სიტყვის გამოსვლისას. ის ყრილობას არ ესწრება, პარტიას კი სკაიპის საშუალებით ვაშინგტონიდან ჩაერთო.

"ერთიანი ნაციონალური მოძრაობა არა მხოლოდ წარსულია, არამედ მომავლის ყველაზე ნათელი ხედვა. ნაციონალური მოძრაობა არის მოძრაობა. მე შემთხვევით არ დავარქვი მას ეს სახელი. შეუჩერებელი და შეუპოვარი მოძრაობაა," - აღნიშნა სააკაშვილმა, რომლის თქმითაც პარტიის ნამდვილი განახლება დღეს, 20 იანვარს იწყება.

მისი თქმით, როგოც სამშობლო და იდეალები არ იყოფა და იშლება, ისე ნაციონალური მოძრაობა.

სააკაშვილი სკაიპის რამდენიმე წუთის განმავლობაში მიმართავდა დელეგატებს. თუმცა, ზოგ შემთხვევაში ხარვეზების გამო მისი ხმა წყდებოდა და არ ისმოდა.

დელეგატებს სიტყვით უკვე მიმართეს მიხეილ სააკაშვილის ცოლმა - სანდრა რულოვსმა და პარტიის რამდენიმე ლიდერმა.