"საქართველოს ამერიკა დაუდგა გვერდით ამ ვიზიტით და თქვა, რომ ჩვენ ვართ ერთად და ჩვენ ამ განვითარებების ფონზე ვაგრძელებთ ჩვენს სტრატეგიულ პარტნიორობას", — ასე შეაფასა აშშ-ის სახელმწიფო მდივნის, მაიკ პომპეოს ვიზიტი აშშ-ში საქართველოს ელჩმა, დავით ბაქრაძემ. მისი თქმით, რეგიონში დაძაბულობის ფონზე, ცალსახაა, რომ საქართველოს შეუძლია ითამაშოს მნიშვნელოვანი როლი მშვიდობის უზრუნველყოფაში.

"ამერიკის შეერთებული შტატების სტრატეგიული ინტერესები ცალსახად ჩანს, რომ უკავშირდება საქართველოს როლს, რომელიც შეუძლია მან ითამაშოს რეგიონში უსაფრთხოებისა და სტაბილურობის უზრუნველსაყოფად. აშშ-სთვის ჩვენ ვართ მტკიცე, ერთგული პარტნიორი სწორედ კავკასიის რეგიონში, სადაც განვითარებული მოვლენებიდან მიმდინარე მტკიცე მხარდაჭერა ჩვენი უსაფრთხოების, ჩვენი სტაბილური განვითარებისთვის", — განაცხადა მან რუსთავი 2-ის ეთერში.

პომპეო თბილისში გუშინ, 17 ნოემბერს საღამოს ჩამოფრინდა და ოფიციალური შეხვედრები დღეს დაიწყო. ის თბილისში 24 საათზე ნაკლები იყო და უკვე წავიდა.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, თუმცა მედიასთან კომენტარები არ გაუკეთებია და მხოლოდ აშშ-ის საელჩოს განცხადებები გავრცელდა. ასევე, პომპეო შეხვდა არასამთავრობო ორგანიზაციებს. ცნობილია, რომ NGO-ებთან საუბრის ძირითადი თემა სასამართლოს დამოუკიდებლობა იყო.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

პომპეოს ვიზიტს წინ უძღოდა ყარაბაღის საკითხზე სომხეთის, აზერბაიჯანისა და რუსეთის შეთანხმება, რის შემდეგაც ყარაბაღში რუსული ჯარები შევიდა.

გაიგეთ მეტი პომპეოს ვიზიტზე: