გირჩის ლიდერის, ზურაბ ჯაფარიძის განცხადებით, ქვეყანასა და რეგიონში მიმდინარე პრობლემებს "ტორტზე მარწყვივით დაედო" პოლიტიკური კრიზისი. ამის შესახებ მან აშშ-ის სახელმწიფო დეპარტამენტთან შეხვედრის შემდეგ განაცხადა.

კითხვაზე, დღევანდელი შეხვედრა ოპოზიციისა და მმართველ გუნდის მესამე ეტაპის მოლაპარაკებებისთვის რაიმე წინაპირობას ხომ არ ქმნის, ის პასუხობს:

"არა, პირიქით. თვითონ ელჩი კელის პოზიცია იყო, რომ ეს მოლაპარაკებები არის მნიშვნელოვანი და იქ შეიძლება, რაღაც გამოსვალი იქნეს მოძიებული. მას კარგად ესმის, რა მასშტაბის კრიზისია ქვეყანაში, მათ შორის ის, რომ ჩვენ გვაქვს ეკონომიკური კრიზისი, რეცესიის მდგომარეობაში ვართ, პლიუს პანდემია გვაქვს, პლიუს რეგიონში გეოპოლიტიკური სიტუაცია იცვლება და ამას ზემოდან მარწყვივით ტორტზე დაედო პოლიტიკური კრიზისი, რომლის შემოქმედიც არის ხელისუფლება", — განაცხადა მან.

ოპოზიციის ლიდერები ამერიკის სახელმწიფო დეპარტამენტის ევრაზიისა და ევროპის განყოფილების ხელმძღვანელს, ფილიპ რიკერს შეხვდნენ. როგორც დეპარტამენტში გამართულ პრესკონფერენციაზე განაცხადეს, ამერიკის სახელმწიფო მდივანმა, მაიკ პომპეომ ის ოპოზიციურ პარტიებთან და არასამთავრობოებთან შესახვედრად დატოვა.

საპარლამენტო არჩევნები საქართველოში 31 ოქტომბერს ჩატარდა. ოპოზიცია შედეგებს არ აღიარებს და ბოიკოტის რეჟიმშია — ისინი პარლამენტში არ შედიან. გუშინ საქართველოს ამერიკის სახელმწიფო მდივანი, მაიკ პომპეო ეწვია, მან ხელისუფლების წარმომადგენლებთან, სამოქალაქო სექტორთან და პატრიარქთან შეხვედრები გამართა. პარალელურად მიმდინარეობდა ოპოზიციის მდუმარე აქციაც.

გაიგეთ მეტი შეხვედრაზე: