მოსავალი თუ გაქვთ ასაღები, ახლა სწორედ ამის დროა: Zynga-მ განაცხადა, რომ 2020 წლის მიწურულს ის Facebook-ზე თავის ორიგინალ ვებთამაშ FarmVille-ს დახურავს.

ეს ამბავი მთლად მოულოდნელი არ არის. Facebook-მა ჯერ კიდევ ივლისში განაცხადა, რომ 31 დეკემბრიდან მას ფლეშ-თამაშების მხარდაჭერა აღარ ექნება — ამავე დროიდან Adobe მთლიანად აუქმებს თავის ფლეშ-პლეიერს.

ნებისმიერ შემთხვევაში, ეს მაინც გეიმინგის ეპოქის დასასრულია. როგორი სულელური და ზოგჯერ გამაღიზიანებელიც არ უნდა ყოფილიყო FarmVille — თანაც როცა ყველა ჩვენი Facebook მეგობარი თავის მოსავალს უვლიდა — ის Zynga-სთვის ძალიან მომგებიანი იყო.

თამაში 2009 წელს გაეშვა და ორ თვეზე ნაკლებ დროში 10 მილიონზე მეტი ყოველდღიური მომხმარებელი ჰყავდა. თავისი პოპულარობის პიკში FarmVille-ს დღიურად 30 მილიონი ადამიანი თამაშობდა, რამაც Zynga-ს რეკორდული შემოსავალი მოუტანა. თამაშს მოგვიანებით მობილურის ვერსია და სიქველიც მოყვა, თუმცა მათ ორიგინალის ჯადოსნური მომხიბვლელობა აღარ ჰქონდათ.

FarmVille-ს მოთამაშეებს 17 ნოემბრამდე შეეძლებათ აპლიკაციის შიდა შესყიდვების განხორციელება, რის შემდეგაც გადახდის სისტემა გაუქმდება. თამაშის გაგრძელება 31 დეკემბრამდე შეგეძლებათ, თუმცა ამის მერე FarmVille-ც სამუდამოდ დაიხურება.

Zynga-ს თქმით, FarmVille 3-ის მობილური ვერსია მალე მსოფლიოს მასშტაბით იქნება ხელმისაწვდომი.